Kryetari i Lëvizjes Vetëvendosje dhe pretendenti për Kryeministër të vendit, Albin Kurti, ka ripërsëritur se pavarësisht thirrjeve të SHBA’së për një marrëveshje finale sa më të shpejtë me Serbinë, kjo nuk është prioriteti i tij tani për tani.
Në një intervistë për mediumin gjerman, Heinrich Böll Stiftung, Kurti ka thënë se fillimisht do të fokusohet në ndërtimin e shtetit demokratik dhe zhvillimin e ekonomisë.
Sa i përket dialogut Kosovë-Serbi, ai thotë se kosovarët dhe serbët në Kosovë më shumë e duan drejtësinë dhe vende pune.
“Fillimisht, më duhet të them se dialogu me Serbinë nuk është prioriteti im. Na duhet të ndërtojmë shtetin demokratik fillimisht, të zhvillojmë ekonominë, si dhe të po të pyesësh kosovarët dhe serbët në Kosovë, krejt çka duan ata është puna dhe drejtësia”, ka thënë Kurti, përcjell Gazeta Metro.
Pyetur nga gazetari Simon Ilse se çfarë mendon për thirrjet e SHBA’së lidhur me dialogun, ai thotë se ky proces nuk duhet të kufizohet me një afat kohor.
“Se di. Ata kanë dy të dërguar. Sigurisht, unë do të doja një marrëveshje finale sa më shpejt, por mendoj se përmbajtja është më e rëndësishme se sa afati kohor që është vendosur”, ka thënë ai.
Kujtojmë se SHBA ka emëruar si të Dërguar Special për dialogun Prishtinë-Beograd, Richard Grenell, si dhe Matthew Palmer, i dërguar Special për Ballkanin Perëndimor.
Të dy këta, brenda një periudhe të shkurtër kanë zhvilluar vizita në Kosovë, ku janë takuar me secilin lider të vendit, të cilëve u kanë bërë thirrje për formim të Qeverisë dhe marrëveshje sa më të shpejtë me Serbinë.
Discussion about this post