Ministri i Punëve të Jashtme, Glauk Konjufca ka thënë se nuk është e sigurt nëse vërtetë Sierra Leone e ka tërhequr njohjen ndaj Kosovës, siç pretendon homologu i tij serb, Ivica Daçiq.
Konjufca në një deklaratë për media tha që është i pavërtetë pretendimi i Serbisë lidhur me këtë çështje.
Shefi i diplomacisë tha se e përkrahë kryeministrin, Albin Kurti në heqjen e tarifës ndaj Serbisë.
Sipas tij duhet të jetë një periudhë tremujore që Kosova të shohë se çfarë sjellje do bëjë Serbia dhe nëse kjo nuk ndryshon atëherë duhet t’i kthehet masës prej 100%.
Ndërkohë, ministri i Punëve të Jashtme i Serbisë, Ivica Daçiq ka prezantuar notën ku sipas tij thuhet se Sierra Leone ka tërhequr njohjen e Kosovës si shtet i pavarur.
“Me kënaqësi mund të prezantojë notën nga Ministria e Punëve të Jashtme ku thuhet se Sierra Leone e tërheq njohjen e Kosovës si shtet i pavarur dhe do të respektojë rezultatet që vijnë nga dialogu, me mbikqyrjen nga BE-ja dhe OKB-ja”, tha Daçiq.
Theksojmë se edhe në mandatin e Behgjet Pacollit sa ishte ministër i Jashtëm, nuk bëheshin publike tërheqjet e njohjeve ndaj Kosovës, edhe pse Serbia vazhdimisht publikonte edhe notat verbale.
Sierra Leone, shtet i Afrikës Perëndimore konsiderohet si vendi i 18-të që e tërheq njohjen e Kosovës si shtet i pavarur.
