Konfirmohet/Palmer vjen në Prishtinë, Albin Kurti jashtë vendit!

Presidenti i Kosovës, Hashim Thaçi, pret nesër në takim Përfaqësuesin Special të SHBA-së për Ballkanin Perëndimor, Matthew Palmer.

Lajmi është bërë i ditur nga Kabineti i Presidentit, sipas të cilit takimi do të mbahet në ora 13:30.

Përfaqësuesi Special i SHBA-së për Ballkanin Perëndimor, Matthew Palmer nesër gjatë ditës do të mbajë një fjalim para studentëve dhe shoqërisë civile në Bibliotekën Kombëtare të Kosovës.

Megjithatë, Palmer nuk do të mund të takohet me kandidatin për kryeministër nga partia e parë e zgjedhjeve të 6 tetorit në Kosovë, Albin Kurtin.

 Mësohet se Kurti është jashtë vendit dhe nuk do ta ketë të mundur takimin me Përfaqësuesin Special të SHBA-ve për Ballkanin Perëndimor.

Zyra e Vetëvendosjes ende nuk ka dhënë detaje se ku gjendet lideri i tyre dhe sa do të zgjasë udhëtimi i tij.

Kurti javën e kaluar e ka përmbyllur mes shumë takimesh në Shqipëri.

E vizita e Palmer në Kosovë ishte paralajmëruar më herët, por nuk ishte caktuar data e vizitës.

Kjo vizitë në vendin tonë vjen pas asaj që Palmer bëri ditë më parë në Maqedoninë Veriore.

Palmer më herët kishte thënë se qëllimi i tij është që të kthejë Beogradin dhe Prishtinën në tryezën e bisedimeve sa më shpejt të jetë e mundur dhe të sigurojë një marrëveshje.

Ai po ashtu kishte treguar se e pranoi postin pasi mendon se mund të arrihet një marrëveshje për normalizimin e marrëdhënieve Beograd-Prishtinë, e cila sipas tij, do t’i hapte rrugën drejt Evropës Serbisë dhe Kosovës.