Deputetja e Partisë Socialiste, Mimi Kodheli iu bashkohet zërave se mos hapja e negociatave të Shqipërisë me Bashkimin Evropian erdhi për shkak të problemeve që vetë Bashkimi Evropian ka, sidomos si pasojë e Francës që ka dhe problemet e saj të brendshme.
“Problemi është se as francezët vetë nuk e dinë se çfarë Evropa kërkon. Kësaj i shtohen edhe problemet e tyre lokale. Dikush ka zgjedhje lokale, dikush ka probleme me rënien e popullaritetit etj., në një kohë që kemi një qëndrim tjetër nga një vend shumë i rëndësishëm siç është Gjermania, por kemi dhe problematikën e BE me një ndër vendet më të rëndësishme që u largua, siç është Britania, si dhe qëndrimet me fqinjët tanë rajonalë,” u shpreh Kodheli e ftuar në një studio televizive.
Por Shqipëria, sipas saj, nuk duhet të kalojë në pesimizëm, por të vazhdojë përpara me angazhimet dhe reformat e saj.
“Ne nuk duhet të biem as disfatizëm as në pesimizëm për këtë gjë, për gjithë këtë kalvar. A e ka merituar Shqipëria ta kalojë këtë kalvar? Mbase rruga e mundimshme drejt njohjes është e tillë që duhet të kalonte nëpër këto kanale”, shprehet Kodheli.
“A është Shqipëria sot në gjendje të përballë gjithë këtë ndryshim të mjedisit mbareuvropian, apo rajonal, duke pasur edhe problemet e veta të zhvillimit? Ne na duhet të jemi racionalë, të fokusuar te gjërat e rëndësishme që duhet t’i çojmë në fund,” deklaroi më tej deputetja socialiste./ATSH/Gazeta Mejdani/
Discussion about this post