Kjo po terrorizon shqiptarët/ Çfarë është ky aplikacioni i tërmeteve?

Inxhinierja Luljeta Bozo ishte e pranishme në mbledhjen e dytë të Komitetit Kombëtar të Rindërtimit.

Pasi foli për ndërtesat e prekura nga tërmeti, ajo u ndal edhe tek një aplikacion në celular, që sipas saj po terrorizon njerëzit.

“Njerëzit të vijojnë jetën normalisht pasi akoma kanë frikë të hyjnë në shtëpi. Tani kanë shkarkuar dhe atë aplikacionin. Shikojnë tërmet 2.9 dhe dalin të gjithë jashtë, por 2.9 nuk e ndjen ndërtesa. Godina e ndjen mbi 4.5 apo 5 magnitudën”, tha Bozo.

Po çfarë është ky aplikacion që është shkarkuar nga qindra-mijëra shqiptarë?

Bëhet fjalë për LastQuake (tërmeti i fundit), një aplikacion i krijuar nga një OJF shkencore, e quajtur Qendra Sizmiologjike Euro-Mesdhetare me qendër në Francë.

Qëllimi i tij është që të raportojë tërmetet shumë më shpejt se qendrat e tjera sizmike.

Nëse i hedh një sy numrit të raportimeve, e kupton vërtet se numri i paslëkundjeve në Shqipëri është shumë i madh dhe mund të ndjehesh keq dhe në panik.

Por si funksionon ky aplikacion?

Ai monitoron tërmetet bazuar në tre shtylla.

Dy shtyllat e para janë të bazuara tek vetë raportimet e qytetarëve nëpër rrjetet sociale. Fillimisht janë qytetarët që mund të raportojnë direkt si dëshmitarë në këtë aplikacion.

Së dyti, aplikacioni ka një filtër që monitoron kur ka një lëvizje të pazakontë të fjalës ‘tërmet’ në rrjet, duke lokalizuar zonën.

Së treti, ai përdor të dhëna që merren nga burime të specializuara ndërkombëtare siç është Shërbimi Gjeologjik Amerikan.

Për shkak se është në gjendje të monitorojë me shpejtësi këto elementë, aplikacioni është ndalesa e parë për informacion për tërmetet.

Më 26 nëntor, aplikacioni nuk e mbajti dot ngarkesën e kërkimeve nga shqiptarët. Dy ditë më vonë u raportua se janë bërë mbi 120 mijë shkarkime të këtij aplikacioni nga Shqipëria.