Një aksident i rëndë trafiku ka ndodhur mbrëmë pas mesnate në rrugën Kllokot-Viti, ku kanë humbur jetën dy persona, derisa një i lënduar rëndë është dërguar në QKUK.
Nga ky aksident kanë mbetur të vdekur Taulant dhe Valon Ramadani nga fshati Smirë e Vitisë. Njëri 32-vjeçar dhe tjetri 35-vjeçar. Lajmin e ka konfirmuar për GazetaBlic edhe zëdhënësi i Policisë për Rajonin e Gjilanit, Ismet Hashani.
“Nga hetimet e para dyshohet se deri te aksidenti të ketë ardhur atëherë kur një veturë në lëvizje në të cilën kanë qenë tre persona në rrugen Kllokot-Viti, humb kontrollin dhe përplaset jashtë rrugës. Me këtë rast lëndime vdekjepruese pëson drejtuesi i automjetit (1985) i cili ndërron jetë në vendin e ngjarjes, ndërsa dy pasagjerët dërgohen në Qendrën emergjente në Gjilan. Njëri nga pasagjerët (1988) edhe përkundër ndihmës së ofruar ndërron jetë si pasojë e lëndimeve të marra në aksident, ndërsa pasagjeri i tretë (1981) dergohet në QKUK-Prishtinë në gjendje të rëndë”, ka thënë Hashani.
Hashani ka shtuar se lidhur me rastin është njoftuar Prokurori për Krime të Rënda dhe me urdhër të tij trupat e pa jetë janë dërguar në Institutin e Mjekësisë Ligjore për obduksion.
Siç shkruan Gazeta Blic, sipas statistikave ditore të PK-së, vetëm gjatë së premtes në Kosovë kanë ndodhur 58 aksidente trafiku, 24 prej tyre kanë përfunduar me persona të lënduar, ndërsa një me fatalitet.
