Kryetari i PDK-së, Kadri Veseli, ka akuzuar kryeministrin e Kosovës, Albin Kurti, se është i rrezikshëm për shtetin e Kosovës, sovranitetin dhe integritetin e vendit, shkruan Gazeta Insajderi.
Veseli i ka thënë Kurtit se atë çka dëgjoi në fjalën e tij në seancën që po mbahet për taksën, i është dukur më shumë si autonomist i kohës së ish Jugosllavisë.
“Është shumë serioze ajo çfarë dëgjuam sot nga kryeministri ynë. Unë do ta konsideroja më shumë se serioze, do ta konsideroja që ky njëri paraqet rrezik për shtetin e pavarur dhe sovran, Republikën e Kosovës, për sovranitetin, për integritetin, për të ardhmen e vendit tonë. Unë sot, kjo sallë është një trashëgimi nga ish Federata, pasha besën mu ka dukur si e kam dëgjuar, si ai këshilli ekzekutiv që ka qenë, një autonomist”, ka thënë Veseli, raporton Insajderi.
Me tutje kreu i PDK-së, i ka kërkuar Kurtit që të sillet si kryeministër sepse tanimë Kosova është shtet i pavarur dhe sovran.
“Po a folën more gjëra si me i pas lluksin si me fol për federatën jugosllave pas 17 shkurtit 2008. Kryeministër, kanë ndërruar gjërat, Kosova është shtet i pavarur dhe sovran, duhet të sillesh si kryeministër i shtetit të pavarur”, shtoi ai.
Veseli e ka quajtur edhe nëpunës doganor kryeministrin Kurti, teksa e ka dëgjuar fjalën e tij.
“Kryeministër, jo veç ty, por askujt në këtë sallë nuk ia mohoj patriotizmin, vetëm ka një gjë, me Serbinë duhet të ndahemi sa më shpejt, nuk mundësh me fol si nëpunës doganor o kryeministër. Pasha besën çka ke nxjerr këtu fjalë janë më tepër të një nëpunësi doganor. Duhet me ndalë taksiratin o kryeministër”, u shpreh kreu i PDK-së.
Sipas Veselit, me Serbinë kurrë nuk kanë mundur të dialogojnë njerëzisht me ta, prandaj jo rastësisht ka pasur luftëra me ta. /Gazeta Mejdani/
