Bedri R. Bytyqi.
Kosova, si Republika më e re e një populli ndër më të vjetrit, pothuajse për 20 vjet që prej çlirimit nga okupatori serb e deri më sot, rrëzikoi e përjetoi nga më të ndryshmet si:
Trazirat e marsit 2004.
Protestat e 2007-ës kundër pakos së Ahtisarit, pako kjo e hapur e ç’hapur nga kushdo që ka pasur dëshirë, pako që nuk përmbushi ëndrrën 100 vjeçare të popullit tonë.
Po në të njëjtin vit shteti kaloi nën udhëheqjen e krahut të luftës.
Pastaj shpallja e pavarësisë në 2008, ngjarja më me rëndësi pas ’99 për popullin e Kosovës, pavarësi kjo e dalur nga pakoja e ardhur si dhuratë, pavarësi megjithatë e gjysmuar, ku pakicat serbe kanë më shumë të drejta se sa shumica shqiptare.
Në 2015 u votua gjykata speciale, për ta gjykuar luftën e pastër të UÇK-së, pikërisht nga ata që ishin UÇK!
Pastaj, në vitin 2015 marrëveshjet që u nënshkruan nga udhëheqësit tanë, me ç’rast u themelua Asociacioni i komunave serbe, shtet brenda shtetit!
Arrestimi i 20 hoxhallarëve kinse për terrorizëm por që nuk u dëshmua kurrë, e që arrestime të tilla nuk kemi parë as në kohën e okupimit serb.
Pastaj “Hapja” e 200 000 vendeve të strehimit nëpër evropë, si pasoj e keqqeverisjes së pushteteve.
Pastaj, nënshkrimi i demarkacionit, në këmbim të të cilit do të bëhej liberalizimi i vizave, që realisht nuk ndodhi kurrë!
Dhe në fund, me 6 tetor 2019, për herë të parë në Kosovë zgjedhjet i fiton opozita,VV dhe LDK, kjo e fundit vetëm dy vjet ishte opozitë, përndryshe për çdo të mirë apo të keqe që ka ardhur nga qeverisja e pas pavarësisë, hisen e vetë e ka aty!
Pas gjithë këtyre, populli pati edhe një shpresë të vetme, t’i provojmë të paprovuarit, Albin Kurtin dhe Vetëvendosjen!
Kjo edhe ndodhi, Kurti bëhet kryeministër duke ndarë qeverisjen me LDK-në.
Dhe kur gjërat po ecnin në rrugën e duhur, Kosova përfshihet nga sëmundja globale Covid 19, një pengesë gjigante pas shumë pengesave tjera për Albin Kurtin si kryeministër i ri, që kishte duruar gjithçka e sakrifikuar shumëçka deri këtë ditë.
Si për inat, tani përpos Covid 19 dhe problemet shtetërore që kanë të bëjnë me gjendjen ekonomike, sociale, politike, që ia grumbulluan paraardhësit e tij, ai duhet të përballet edhe me kushtëzimet e partnerit qeverisës, që ta mbajë në këmbë qeverinë e tij.
Paj, le të shkojë n’dreq t’mallkuar edhe kjo qeveri, ne si populli vuajtjen e kemi gjak por mosdorëzimin e kemi venë të gjakut, andaj le të pastrohet një herë e mirë ky gjak, e le të qarkullojë si duhet nëpër vena.
Kosovës, apo thënë më mirë shqiptarëve të Kosovës iu ka mbetur vetëm edhe një “rrezik” për ta provuar, që për herë të parë ta votojnë një parti me 51% të votave, që ajo të mos kushtëzohet nga asnjë parti tjetër, që e mira dhe e keqja ta kenë një adresë të vetme.
Nuk duam e nuk guxojmë të kthehemi para 6 tetorit të 2019-ës, duhet të ecim përpara, ta votojmë Albin Kurtin dhe Vetëvendosjen me mbi 51%, që mos të kenë shancë që fajin ta bartin diku tjetër.
