Ja si i përgjigjet Isa Mustafa deklaratës së Haradinajt: ‘Kush e heq taksën është budalla’!

Kryeministri në largim, Ramush Haradinaj ka thënë se vetëm një budalla mund ta heqë taksën ndaj produkteve serbe e boshnjake. 
Këto deklarata për shefin e LDK-së janë pjesë e një fushatë denigruese që po përdoret në prag të themelimit të qeverisë së re.

Kryetari i Lidhjes Demokratike, Isa Mustafa, ka deklaruar se akuzat që po bëhen nëpër studio televizive më shumë po i përngjajnë një fushate denigruese e cila krijon rezerva për bashkëpunim të ndërsjellë.

Këtë përgjigje ish-shefi i Qeverisë e ka dhënë duke iu përgjigjur akuzave të Ramush Haradinajt, i cili tha se s’bën të zëvendësohet taksa ndaj Serbisë me reciprocitet.

“Janë disa çështje, të cilat duhet të diskutohen dhe të trajtohen me seriozitet të plotë në këtë fazë dhe pasi të krijohet Qeveria. Nuk është në pyetje vetëm tarifa por edhe disa deklarata dhe akuza në studio televizive, të qëllimshme apo jo, të cilat më shumë po i përngjajnë një fushate denigruese e cila  krijon rezerva për bashkëpunim të ndërsjellë ndërmjet palëve”, ka deklaruar Mustafa për Express.

Kryeministri në largim, Ramush Haradinaj derisa ka folur për punën ekzekutive, ka deklaruar se largimi i taksës nga ana e Qeverisë së re do të ishte hap i gabuar në kohën kur sipas tij Serbia po vazhdon që t’i përkeqësojë raportet ndaj Kosovës.

Sipas tij, largimi i taksës 100 për qind ndaj produkteve të Serbisë do të ishte në dëm të prodhuesve vendor, që gjatë kësaj kohe kanë shënuar rritje në prodhim e punësim.