Kryetari i Lidhjes Demokratike të Kosovës, Isa Mustafa, iu është kundërpërgjigjur deklaratave të mbrëmshme të kryetares së Kuvendit, Vjosa Osmani.
Mustafa i ka rikujtuar Osmanit se i kanë humbur zgjedhjet e 6 tetorit dhe se pozitat aktuale që i mban sot i ka falë politikës dhe lidershipit të LDK’së, meqë kishte kushtëzuar Kurtin që t’a shkarkonte Konjfucën dhe t’a propozonin Osmanin për kryekuvendare.
Kryetarja e Kuvendit të Kosovës dhe ushtruesja e pozitës së presidentit, Vjosa Osmani, këtë të premte kishte zgjedhur Televizionin Publik të Kosovës për t’i qeruar hesapet me Lidhjen Demokratike të Kosovës. Përmes valëve të RTK’së, Osmani mbrëmë i dha opinionit kumtin se rrugëtimin e saj politik do ta vazhdojë e vetme dhe se nuk do të bashkëpunojë me Lidhjen Demokratike të Kosovës, meqë sipas saj, kjo parti ka mbajtur në pushtet kapësit e shtetit. Përveç kësaj, kandidatja e LDK’së për kryeministre në zgjedhjet e 6 tetorit, ka thënë se tashmë partisë së themeluar nga Ibrahim Rugova i ka mbetur vetëm llogo-ja dhe se votuesit i përfaqëson vetëm ajo.
Lidhur me këto akuza të Osmanit, në një intervistë ekskluzive për Gazetën Express ka folur kreu i Lidhjes Demokratike të Kosovës, Isa Mustafa.
Isa Mustafa ia ka rikujtuar Osmanit faktin se Lidhja Demokratike e Kosovës i ka humbur zgjedhjet e 6 tetorit dhe thotë se bazuar në atë rezultat zgjedhor, qytetarët e kanë votuar Osmanin vetëm për deputete.
“Lista zgjedhore, në të gjitha zgjedhjet ka qenë e LDK-së, me logo të LDK-së, e përkrahur nga të gjitha strukturat e partisë dhe e votuar nga anëtarë dhe simpatizantë të LDK-së. Të gjitha pozitat që i mbajnë njerëzit e LDK-së, janë rezultat i politikave të LDK-së. Zgjedhjet e vitit të kaluar nuk janë fituar.I kemi humbur. Sipas këtyre rezultateve, qytetarët e kanë votuar Vjosën vetëm për deputete”, ka thënë Mustafa.
Ish-kryeministri dhe i pari i LDK’së thotë se të dy pozitat që sot i mban Vjosa Osmani, pra atë të kryetares së Kuvendit dhe ushtrueses së detyrës së presidentit, janë si rezultat i politikave të partisë dhe vetë Mustafës si kryetar, e jo si rezultat i votave.
Mustafa në këtë intervistë për Gazetën Express thotë se në negociatat më Lëvizjen Vetëvendosje për koalicion, kishte kushtëzuar Albin Kurtin që ta shkarkonte Glauk Konjufcën nga pozita e kryetarit të Kuvendit dhe në atë pozitë të vendosej Vjosa Osmani.
“Ndërkaq në proces të negociatave me VV për bashkëqeverisje, si Kryetar i LDK-së kam kushtëzuar që VV të propozojë Vjosa Osmanin për Kryetare të Kuvendit, duke e shkarkuar Glauk Konjufcën. Pra pozitat që i mban sot Vjosa ia ka siguruar lidershipi i LDK-së, unē si Kryetar e kam nënshkruar marrëvedhjen. Mbi këtë bazë sot është edhe ud e Presidentit. Nuk e ka bërë vota, por marrëveshja politike që e kam drejtuar unë si Kryetar i LDK-së. Me vota do të ishte Glauk Konjufca Kryetar i Kuvendit dhe ud të Presidentit”, ka shtuar tutje i pari i LDK’së
Mustafa e lë në ndërgjegjen e Osmanit faktin që ajo vazhdon të qëndrojë kryetare e Kuvendit dhe tashmë edhe u.d e presidentit edhe pas prishjes së koalicionit me Lëvizjen Vetëvendosje.
Derisa ka pyetur Osmanin se në çfarë cilësie i mbanë këto dy pozita, si anëtare e Lidhjes Demokratike të Kosovës apo si pjesëtare e Lëvizjes Vetëvendosje.
“Çështje tjetër është se a është morale dhe etike që pas prishjes së koalicionit dhe të marrëveshjes, Vjosa të vazhdojë ta mbajë atë pozitë që ka derivuar nga marrëveshja e prishur. Shihet qartë se ajo nuk ka reflektuar parime. Po e përgojon lidershipin e LDK-së se e vetmja deshire e tyre është të mbesin në pushtet , ndërkaq duhet të merret me pushtetin e saj dhe me faktin se kah i buron ky pushtet. Duhet të deklarohet se pozitën si Kryetare e Kuvendit rrjedhimisht edhe si ud e Presidentit a e mbanë si anëtare e LDK-së apo e VV-së. Mbi të cilat parime qëndron në ato pozita?!?”, ka thënë Isa Mustafa për Express.
Isa Mustafa thotë se si Lidhje Demkratike nuk e llogaritin si të tyren meqë është prishur koalicioni me Lëvizjen Vetëvendosje.
Në fund i pari i LDK’së thotë se nga zgjedhjet e fundit, Osmanit i ka mbetur vetëm vota e “duetit Haxhi Avdyli & Haki Abazi”, derisa shton se “Të tjerët i ka zhgënjyer”.
