Lideri Lidhjes Demokratike të Kosovës, Isa Mustafa, ka thënë se lideri i Lëvizjes Vetëvendosje, Albin Kurti, ka gabuar në vlerësimet e tij për SHBA-në edhe në kohën kur ishte kryeministër e po gabon edhe tash kur po flet për ftesën e SHBA-së për Kosovën e Serbinë për dialog.
Madje sipas Mustafës, nëse Kurti do të bashkëvepronte me SHBA-të, ai do të ishte ende kryeministër.
“Zoti Kurt ka krijuar dyshime të takimeve në Uashington edhe gjatë kohës kur ishte kryeministër. Ka gabuar atëherë dhe edhe sot gabon. Po të bashkëvepronte me SHBA-në ai sot do të ishte kryeministër”, ka thënë Mustafa.
A ka thënë se nuk kishte pritur që Kurti të bie aq shpejt nga pushteti.
Mustafa thotë se pavarësisht dallimeve mes SHBA-së dhe BE-së, sa i përket dialogut ndërmjet Kosovës dhe Serbisë, më në fund do të arrihet një marrëveshje, pasi që konsideron se procesi i dialogut është stërgjatur.
Ai thotë se janë të bindur se përfshirja e SHBA-së në këtë proces do të rezultojë me një marrëveshje përfundimtare.
“Kemi besimin e plotë në SHBA dhe shpresojmë që deri në fund të vitit të kemi një marrëveshje gjithëpërfshirëse ndërmjet Kosovës dhe Serbisë, e cila do t’i hapte rrugë Kosovës në anëtarësim në OKB dhe mekanizma të tjerë”, tha Mustafa në RTK.
