Autoritetet e Kosovës, vite më parë kishin miratuar bashkimin formal të Administratës Tatimore dhe Doganave në një agjenci të përbashkët, të quajtur Agjencia e të Hyrave e Kosovës.
Iniciativa për krijimin e Agjencisë së të Hyrave, ishte plan i ministrit të mëparshëm të financave Avdullah Hoti nga radhët e LDK-së.
Bashkimi i sistemit të mbledhjes së të hyrave për buxhetin e Kosovës, parashihej që do përmirësonte shërbimet për tatim-pagues dhe do kishte rezultate në luftimin e evazionit fiskal.
Bashkimi i ATK-së dhe Doganës në një institucion të vetëm, u prit të ndodh në vitin 2018 mirëpo i njejti u shtye për muajin janar të vitit 2019. Mirëpo kjo nuk ndodhi as në muajin janar në kohën sa kryeministër i vendit ishte Ramush Haradinaj.
Syri.net Kosova, më parë kishte raportuar se iniciativa e Hotit për bashkim, nuk ishte perkrahur nga qeveria Haradinaj, por ishte premtuar vetëm bashkim i pjesshëm, gjë që nuk ndodhi.
Por, tash kur kryeministër i vendit u zgjodh vetë iniciatori i kësaj ideje, Avdullah Hoti, në programin qeverisës i cili pritet të miratohet në qeveri, sërish ka përfshirë si objektiv krijimin e Agjencisë së të Hyrave të Kosovës.
