Deputeti nga radhët e Partisë Demokratike të Kosovës, Bekim Haxhiu ka thënë se vendi ndodhet buzë kolapsit me pandeminë COVID-19 dhe sipas tij nëse vazhdohet kështu shumë shpejt do të jetë një situatë kur spitalet nuk do të kenë kapacitete për të përballuar fluksin e të sëmurëve dhe nuk do të ketë oksigjen dhe aparate respiratore të mjaftueshme për pacientët e shtrirë në spitale.
Haxhiu në një postim në rrjetin social Facebook shkruan se interesat politike partiake dhe grupore po vazhdojnë të dominojnë mbi ato të qytetarëve dhe të pacientëve.
E SPONSORUARLEXO MË SHUMË
Lexoni të plotë postimin e deputetit të PDK-së:
“Alarmante, jemi buzë kolapsit me pandeminë COVID-19 !
7137 raste pozitive, 177 raste të vdekjes, 8 raste të vdekjes ne 24 orët e fundit , 3874 të shëruar dhe 3086 raste aktive.
Situata mund të bëhet e papërballueshme.
Nëse vazhdohet kështu shumë shpejt do të vijmë në situatë kur spitalet tona nuk do të kenë kapacitete për të përballuar fluksin e të sëmurëve dhe nuk do të ketë oksigjen dhe aparate respiratore të mjaftueshme për pacientët e shtrirë në spitale.
Me nga 20 raste në ditë me COVID-19 kemi qëndruar mbyllur dy muaj e gjysmë në shtëpi, tani me më shumë se 200 raste në ditë jo që nuk ka mbyllje, por edhe po neglizhohet dhe me joseriozitet po trajtohet pandemia COVID-19.
Qytetarë të nderuar, ju bëj apel që të jeni të kujdesshëm dhe të përgjegjshëm karshi situatës në të cilën ndodhemi, mbani maska, mos u përshëndetni dorë për dore, mbani distancë, mbani higjienën personale, dezinfektoni hapësirën ku jetoni dhe punoni.
Situata me pandeminë është buzë kolapsit.
Qeveritë e mashtrimit të 6 Tetorit, janë shndërruar në qeveri të zhgënjimit për shkak të paaftësisë që janë duke e treguar në menaxhim të situatës me pandeminë.
Interesat politike partiake dhe grupore po vazhdojnë të dominojnë mbi ato të qytetarëve dhe të pacientëve”.
