Kreu i AAK-së, Ramush Haradinaj, duke folur për rezultatin e zgjedhjeve të 14 shkurtit, ka thënë se Kosova pret nga fituesit e zgjedhjeve krijimin sa më të shpejtë të institucioneve.
Me anë të një postimi në Facebook, ai ka thënë se VV duhet të përmbush obligimet që dalin nga Kushtetuta, përfshirë këtu dialogun e brendshëm dhe të jashtëm.
“Kosova sot, prej fituesve të rinj të zgjedhjeve pret krijimin sa më shpejt të institucioneve dhe përmbushjen e obligimeve që dalin nga Kushtetuta, duke përfshirë këtu dialogun e brendshëm dhe të jashtëm, që të vetmin përcaktim ka ruajtjen e sovranitetit dhe të integritetit të vendit e karakterit unitar të shtetit”, ka shkruar ai.
Haradinaj tutje ka kritikuar edhe vendimin e partisë së Albin Kurtit për të marrë pjesë në zgjedhjet në Shqipëri.
Ai thotë se të tjerët këtë mund ta shohin si një hile dhe mundësi për të rikthyer skenarë të vjetër për ndarje.
Postimi i plotë:
Kosova sot, prej fituesve të rinj të zgjedhjeve pret krijimin sa më shpejt të institucioneve dhe përmbushjen e obligimeve që dalin nga Kushtetuta, duke përfshirë këtu dialogun e brendshëm dhe të jashtëm, që të vetmin përcaktim ka ruajtjen e sovranitetit dhe të integritetit të vendit e karakterit unitar të shtetit.
Dialogu i brendshëm vetëm me përfaqësues minorë e pa ndonjë fuqi elektorale të serbëve nga pjesa qëndrore e Kosovës, jo vetëm se mund të jetë selektiv, por edhe sinjal i keq për karakterin unitar të Shtetit.
E konsideroj poashtu të parakohshme ngutjen për të marrë pjesë në zgjedhjet parlamentare në Shqipëri dhe druaj se, në mos për vetë pjesëmarësit në këto zgjedhje, të tjerët do ta shohin si një hile dhe mundësi për të rikthyer skenarë të vjetër për ndarje.
E pakta kjo mund të konsiderohet si një lloj pafuqie për tu përballur me integrimin e patjetërsueshëm të veriut të vendit!.
