Kryeministri në dorëheqje, Ramush Haradinaj ka folur mbrëmë në emisionin Pressing, ku ka thënë se taksa 100% ndaj mallrave serbe ka arritur efektin pozitiv hiç më pak se 100%, transmeton Gazeta Mejdani.
“Qytetari i Kosovës sigurisht për herë të parë e ka parë se si është kur shteti i bën Serbisë bllok, si rasti me taksën 100%, efektet e saj të shpejta, pastaj vendimi për Trepçën, sundimi i ligjit në veri, aty ku ka pasur ndërhyrje ndaj krimit të organizuar dhe shkelësve të ligjit”, ka thënë Haradinaj.
Haradinaj është shprehur i bindur se të gjithë qytetarët e Kosovës qendrojnë prapa kauzës 100% shtet dhe forcimi i shtetësisë së Kosovës, andaj veprimet e qeverisë janë bazë e mirë për forcim të pozicionit të shtetit, zhvillim ekonomik dhe sundim të ligjit.
Haradinaj gjithashtu ka folur edhe për ofertat dhe negociatat për koalicione parazgjedhore. Për Nismën dhe AKR’në e kanë lënë derën e hapur, ka shtuar ai.
“Jo as nuk kemi pasur ofertë as negocim, vetëm PSD i kemi bë ofertë më direkt, e kemi lënë të hapur mundësinë për Nismën e AKR” deklaroi Haradinaj.
Ai deklaroi se diskutimet me PSD’në kanë qenë konkrete dhe kjo ka bërë që të ketë një marrëveshje mes tyre, madje sipas tij ka ndikuar shumë edhe votimi i Ushtrisë dhe buxhetit që PSD e ka bërë sa ishte në opozitë.
Ndërsa për Kadri Veselin, ai nuk pranoi të komentojë shumë, por tha se “përvoja ime me të nuk ka qenë në ekzekutiv sepse ai ka qenë kryetar parlamenti”.
Në fund të atij emisoni u shpallë edhe rezultati i sondazhit për votimin e tij si kryeministër. Haradinajn e votuan 72% të shikuesve të emisionit./Gazeta Mejdani/
Discussion about this post