Ka vdekur edhe një person nga COVID-19 në Kosovë, derisa numri i viktimave ka shkuar në 34.
Bëhet fjalë për një 74 vjeçare N.D nga Komuna e Rahovecit, e cila ishte në Mjekim Intensiv në Klinikën Infektive të QKUK-së.
Sipas raportit zyrtar të Ministrisë së Shëndetësisë, thuhet se ajo ishte pranuar në Klinikën Infektive më 5 qershor dhe përveç infeksionit me COVID-19 kishte edhe sëmundje të tjera shoqëruese.
Kështu ka thënë për IndeksOnline edhe kryteari i Rahovecit, Smail Latifi, derisa i njëjti ka treguar edhe për gjendjen e familjarëve të së ndjerës, të cilët po ashtu janë të prekur nga koronavirusi.
“74 vjeçarja që ka vdekur sot ka pasur probleme të jashtëzakonshme shëndetësore, me tension, me sheqer, me zemër edhe kuptohet edhe tash me COVID. I ka edhe tri vajza e një djalë me koronavirus, gjendja e tyre shëndetësore është tepër e mirë, shumë stabile, nuk kanë asnjë problem. Ndërsa, 3 raste i kemi në Klinikën Infektive absolutisht me gjendje të mirë shëndetësore.
Tash nëse i marrim me probleme serioze shëndetësore dhe që kanë pas COVID-19 janë 4 në komunën tonë që kanë ndërruar jetë. 3 kanë qenë në hemiodializë, ndërsa viktimae fundit me problem të shumta shëndetësore”, ka thënë Latifi.
I njëjti ka shtuar se momentalisht gjendja në këtë komunë janë 16 raste aktive me COVID-19, ndërsa janë 33 të shëruar. Ndërsa tha se gjendja është e menaxhueshme dhe janë në pritje të marrjes së mostrave të rasteve të kontaktit nga 9 rastet e fundit që kanë rezultuar mbrëmë pozitiv.
Kujtojmë që pikërisht dje, patëm numër rekord të rasteve me COVID-19, ku nga IKSHPK u konfirmuan gjithsej 129 raste, duke çuar kështu numrin e të infektuarve në 1615.
