Drejtori i Përgjithshëm i Shërbimit Korrektues të Kosovës, Nehat Thaçi, në një prononcim për IndeksOnline, ka pranuar se sot një numër i vogël i të burgosurve në Qendrën e Paraburgimit në Hajvali kanë refuzuar mëngjesin.
Ai tutje ka thënë shkurt për IndeksOnline, se pakënaqësia e tyre s’ka të bëj me kushtet në këtë qendër, por se kjo mund të përdoret si trysni për parlamentin që të aprovoj ligjin ku në raste specifike si ky i tanishmi do të mund të liroheshin disa prej të burgosurve.
“Një numër i vogël nuk e ka pranuar mëngjesin, sigurisht arsyeja është me ba trysni në parlament për me bë një ligj. Mirëpo kjo nuk ka të bëjë me Shërbimin Korrektues, në mbrëmje do të qartësohet situata dhe do të ju përgjigjem përsëri. Ne do tua sqarojmë se kjo nuk është e lehtë për tu arritur”, ishte përgjigjja e Thaçit për IndeksOnline.
Ndryshe 40 të burgosur nga Qendra e Paraburgimit në Hajvali pak më parë i kanë shkruar KMLDNj-së, letër ku ankohet se nuk po lirohen për të shkuar tek familjet e tyre.
Revoltën e shprehin kundër Qeverisë së Kosovës dhe Presidentit të Kosovës që nuk kanë ndërmarrë asnjë veprim për kërkesat e tyre apo kërkesat e OJQ-ve monitoruese dhe të cilat e kanë bërë një kërkesë të tillë. Të burgosurit në Qendrën e Paraburgimit në Hajvali, përmes një letre dërguar KMDLNj –së kanë deklaruar se janë të frikësuar për shëndetin e tyre dhe të familjeve aq më parë që më nuk kanë vizita dhe komunikimin me familje e bëjnë vetëm përmes telefonit dhe skyp-it.
