Ka dështuar të mbahet sot seanca për rastin “Syri i Popullit” për tentim-vrasje ndaj Azem Vllasit.
Në këtë rast është i përfshirë edhe anëtari i Këshillit Drejtues të Lëvizjes Vetëvendosje, Sadri Ramabaja.
I njëjti lidhur me këtë çështje ka thënë se po hynë në vazhdën që nuk i është dashur Kosovës.
“Ky proces hyn në vazhdën që nuk i është dashur Kosovës dhe në mënyrën që po prodhon sistemi i drejtësisë sonë sepse pjesa e parë kishte filluar si tragjedi-komedi meqë në brendi të saj ishte po ajo që unë vazhdimisht më ka befasuar, që mediat asnjëherë nuk e kanë prezantuar program aktakuzën që e ka ngritur Prokuroria Speciale e Kosovës”, ka thënë ai.
Përfshirjen e tij dhe akuzat se ishte pjesë e tentim-vrasjes së Vllasit, Ramabaja e konsideroi si skenarin e tretë të ShIK-ut për ta eliminuar nga skena politike, LVV-në.
“Natyrisht që isha target i përfshirjes së shtetit. Ky është skenari i tretë që do të provonte koka e ShIK-ut, respektivisht e PDK-së, për të eliminuar nga skena politike Lëvizjen Vetëvendosje. Skenari i parë kishte dështuar me tërheqjen në demonstratë të VLAN-it, një ditë para se të ndodhte ajo demonstratat. Skenari i dytë ishte me Astrit Deharin dhe ky ishte skenari i tretë”, ka thënë ai.
Ramabaja më tutje në emisionin “Frontal”, në T7, tha se edhe ikja e dëshmitarëve në këtë proces , sipas tij është dëshmi se rasti është i montuar.
“Unë mendoj që është totalisht i montuar, pasi edhe dy dëshmitarët kanë ikur dhe kanë kërkuar azil në Francë. Duket që procesi i hetimeve do ta vë në pah në të ardhmen se kjo ishte një përpjeke për të manipuluar nga dy diplomat tanë me personalitetin e Muratit. Ka qenë një terren i rregulluar për të më implikuar edhe mua”, ka thënë Ramabaja në T7.
Ai ka folur edhe me raportet që kishte me të akuzuarin tjetër në këtë rast, tashmë të ndjerin Murat Jasharin.
“Me Muratin unë nuk jam takuar nga viti 1991 deri në janar të 2017-ës kur e kam parë për herë të fundit atë. Duket se këtu ka qenë qëllimi. Nuk më ka shkuar mendja që në një vend që pretendohet të jetë mbrojtës i ligjit, redaktorët të përndjekin”, ka deklaruar ai.
Ai ka folur edhe për lidhjen me Avni Llumnicën, të akuzuarin e tjetër në rastin “Syri i Popullit”.
“Nuk e kam njohur asnjëherë dhe e kam përshtypjen që ai është totalisht viktimë. E kam parë me 11 mars bashkë me Muratin dhe nuk e ka folur asnjë fjalë. E kam përshtypjen që kanë qenë të dy të manipuluar dhe janë dërguar në Kosovë”, ka deklaruar ai në T7.
Kritika ai pati edhe për ish-kryeprokurorin, Sylë Hoxha, që sipas tij ishte në shërbim të ShIK-ut.
“Befasia më e madhe është se figurat më të mëdha të drejtësisë që kanë shërbyer në regjimin e Millosheviqit, kanë shërbyer edhe për ShIK-un. Është rasti i kryeprokurorit Sylë Hoxha, që është i implikuar edhe në rastin e Astrit Deharit. Tash janë munduar që ta implikojnë edhe në politikë”, ka thënë ai.
Për sa i përket këtij rasti, Ramabaja tha se ish-kryeprokurori Sylë Hoxha di shumë gjëra që po mbahen fshehët.
“Besoj që ai din shumë më shumë për rastin e Astrit Deharit. Besoj që raporti i ri do të plotësojë shumë më shumë të vërtetën rreth Astrit Deharit. Padyshim që ajo ka qenë vrasje. Prapa këtij rasti dhe ‘Syrit të Popullit’ gjendet ShIK-u”, ka deklaruar ai.
