Duke u bazuar në të dhënat e fundit, kanceri i mushkërive është shkaktari më i shpeshtë i vdekjes nga kanceri në botë; ai vret më shumë njerëz se sa kanceri i zorrës së trashë, i gjirit dhe ai i prostatës së bashku.
Kur ne e zbulojmë kancerin e mushkërive duke u bazuar në simptoma, sëmundja veç është në një fazë të avancuar, kështuqë trajtimet me qëllim të shërimit janë të pamundura në mbi 90% të rasteve.
Shoqatat e ndryshme ndërkombëtare të mjekësisë rekomandojnë që një grup i caktuar i njerëzve që janë më të rrezikuar për paraqitjen e kancerit të mushkërive, të testohen pa pasur simptoma të kancerit. Ky testim planifikuar quhet skrining i kancerit të mushkërive. Njerëzit që rekomandohet t’i nënshtrohen këtij skriningu janë personat e moshave nga 55 deri 75 vjeçare të cilët kanë histori të gjatë të duhanpirjes prej 30 pako/vite, që i bie 30 vite të duhanpirjes nga një pako ne ditë apo 15 vite nga 2 pako në ditë.
Skriningu i kancerit të mushkërive bëhet me TK (tomografi të kompjuterizuar apo CT). Ky ekzaminim shfrytezon 90% më pak rrezatim se sa një ekzaminim i zakonshëm me TK si dhe ka gjasa t’a dallojë një tumor në fazë të hershme katër herë më shumë se sa një radiografi (rëntgen) e zakonshme e gjoksit.
Zbulimi i hershëm i tumorëve na mundëson që t’a mjekojmë sëmundjen me qëllim të shërimit të saj (përmes largimit me operacion të tumorit, trajtimi me kemoterapi etj). Në këtë mënyre ne mund t’a përmirësojmë prognozën dhe jetëgjatësinë te pacientët dhe njëkohësisht t’i zvogëlojmë shpenzimet mjekësore.
Dr.Besim Morina (Specialist i Mjekësisë interne dhe Pulmologjisë)
Poliklinika EndoCLINIC / 044 660 900/
