Fiknete Bejta: LDK-ja nuk mund t’i çojë përpara temat e mëdha pa Haradinajn!

Kandidatja për deputete të Kuvendit të Kosovës nga radhët e koalicionit AAK-PSD, Fiknete Bejta, ka qenë e ftuara e radhës në intervistën e lajmi.net.

Fiknete Bejta, kandidate për deputete të Kuvendit të Kosovës nga radhët e koalicionit AAK-PSD, në një intervistë për lajmi.net ka folur për planprogramin qeverisës të këtij koalicioni dhe për koalicionet e mundshme paszgjehdore.

Edhe pse është njëra ndër asamblistet më të zëshme në Kuvendin Komunal të Prishtinës dhe kritikuese e madhe e punës së Shpend Ahmetit, partia e saj AAK ka bërë koalicion me PSD-në e udhëhequr nga Ahmeti.

Bejta në këtë intervistë për lajmi.net, ka thënë se AAK-PSD është koalicioni më i mirë.

“Para së gjithash, punën në asamble e shoh si përgjegjësi dhe jo privilegj, konform kësaj edhe jam munduar të kryej punën sipas rregullave. Sa kam qenë kritike kam qenë edhe bashkëpunëtore. Kur ka pasur hapësirë për kritika unë nuk e kam mbyllur gojën para problemeve ose dështimeve në komunë. Mirëpo ka pasur raste shumë raste kur kemi pasur bashkëpunim shumë të mirë me kryetarin Ahmeti. Sa i përket koalicionit me PSD-në, unë mendoj që është koalicion i mirë dhe kanë zhvilluar disa politika në komunë që kanë sjellë dobi për qytetarët”, ka thënë Bejta.

Fiknete Bejta ka qenë dikur pjesë e Lidhjes Demokratike në Kuvendin Komunal të Prishtinës, mirëpo tani ajo thotë se ish-subjekti i saj politik temat e mëdha mund t’i çojë përpara vetëm nëse është në koalicion me AAK-në dhe me udhëheqjen e Haradinajt.

Lajmi.net: A mendoni se LDK-ja mund t’i shtyjë përpara temat e mëdha dhe çështjet me më rëndësi për Kosovën?

“LDK ka kuadro të  mirë është parti serioze, është parti shtetëndërtuese, mirëpo nuk besoj që do të mund të shtyjë përpara proceset ashtu siç mundet Haradinaj. LDK-në e shohë si pjesë të koalicionit të qeverisë së ardhshme dhe dëshira ime e madhe është që LDK-ja dhe AAK-ja të jenë në një qeveri të përbashkët pas 6 tetorit që do të udhëhiqet nga zotëri Haradinaj”, është përgjigjur Bejta.

Në këtë intervistë Bejta po ashtu ka folur edhe për taksën. Sipas saj, taksa nuk ka pasur ndonjë ndikim në buxhet, por ka ndikuar në vetëdijësimin e qytetarëve dhe në rritjen e prodhimit vendor.

“Taksa nuk ka ndikuar në rritjen ose zvogëlimin e buxhetit të shtetit”, ka thënë Bejta,e cila ka shtuar se ka shtim të rritjes së prodhimit vendor dhe të punësimit.

Tutje ajo ka thënë se taksa ka ndikuar në vetëdijësimin e qytetarëve.

“Ka ndryshuar dëshira apo kërkesa për të blerë produkte serbe”, ka thënë Bejta, e cila shtoi se produktet serbe kanë qenë të dyshimta dhe se kjo taksë nuk do të hiqet deri në njohjen e pavarësisë së Kosovës nga ana e Serbisë.

Por sa i përket koalicioneve të mundshme paszgejdhore, Bejta ka thënë se AAK-ja nuk ka vija të kuqe me asnjë parti që nuk e vë në rrezik tërësinë territoriale.

“Aleanca nuk ka vija të kuqe për partitë që nuk e vënë në rrezik tërësinë territoriale”, ka deklaruar ajo.

Më poshtë ju sjellim intervistën e plotë me Fiknete Bejtën të realizuar nga gazetari, Nehat Sadiku. /Lajmi.net/