Po shkruaj me vonesë, jo që nuk kisha çka të shkruaj, e as që kisha frikë të shkruaj, dhe as që prita që t’i konsumoj të gjitha shkrimet, por arsyeja është se politikat e platfromës facbook më bllokuan për tri ditë të plotë akoma pa shkruar gjë, pra për një shkrim të 8 janarit 2020 më futën në “agjërim” postimesh për tri ditë.
Shkruan: Bedri R. Bytyçi
Se fetaria jonë ka mbet vetëm në rrjete sociale na dëshmon ndodhia e fundit në lidhje me cicërimën e ambasadorit të Kosovës në Francë.
Përderisa Pejgamberin a.s. e ofenduan edhe në kohën sa ishte gjallë, s’ka dyshim se atë do ta ofendojnë, do të mundohen ta nënçmojnë, ta përulin e ta denigrojnë edhe pas vdekjes së tij e deri në Ditën e fundit të kësaj bote.
E rëndësishme është se si duhet të jetë sjellja e një myslimani ndaj këtyre ofendimeve e sharjeve?
E shembullin më të mirë e kemi pikërisht Muhamedin a.s. gjithnjë duke u bazur në ajetin kuranor: “Ju keni shembull të mrekullueshëm në Profetin e All-llahut…” Ahzab 21
Kur e ofendonin Muhamedin a.s., ai ua kthente me lutje duke thënë: Zot, fali se nuk dinë!
Prej ofendimeve më të rënda që iu bënë të Dërguarit të Zotit ishte kur ia hodhën zorrët në qafë përderisa ai falej në Mekë, e quanin të çmendur, e çkado tjetër, por Muhamedi a.s. nuk ua kthente në të njëjtën mënyrë.
Madje, ai i fali të gjithë në ditën kur pushteti ishte në dorën e tij me rastin e çlirimit të Mekës.
Në rrjetet sociale u vërsulëm duke e mbrojtur Muhamedin a.s., por sa ka nevojë Muhamedi a.s. për mbrojtjen tonë?
Mbrojtja më e mirë është vetëm atëherë kur ne, jetën tonë e realizojmë sipas sunetit të tij, sipas këshillave të tij, sipas asaj që ai na ka mësuar dhe edukuar.
Të gjithë ne që e mbrojtëm të Dërguarin me një status, foto apo diçka të ngjajshme, le ta shikojmë sjelljen tonë ditore se sa e kemi në përputhje me mësimet e Pejgamberit a.s.?
Mbrojtja më e mirë ndaj të Dërguarit është përmirësimi i sjelljes sonë, përmirësimi i gjuhës sonë, përmirësimi i marrëdhënieve shoqërore me njëri-tjetrin.
Pra, sjellja jonë është mbrojtja dhe paraqitja më e mirë e të Dërguarit të njerëzimit te të tjerët që e ofendojnë atë!
E për ata që e ofendojnë Muhamedin a.s. dhe myslimanët, Zoti na ka dhënë myzhde në Librin e Allahut ku ka thënë: E s’ka dyshim se urrejtësi yt është farësosur.” Keuther 3
Përderisa njerëz të tillë kemi në udhëhqje, direkt dhe indirekt vet ne jemi përgjegjës, sepse me votë kemi zgjedhur ata që i zgjedhin të tillët.
Këto raste më së miri e dëshmojnë fjalën e të Dërguarit i cili ka thënë: “Atë ditë do të jeni shumë, por vlera juaj do të jetë si shkuma e detit!”
Zot, na përmirëso ne e udhëzoi ata!
