Fëmijët e Ibrahim Rugovës po e bojkotojnë Vjosa Osmanin dhe rugovizmin e LDK-së!

Fëmijët e Rugovës nuk po e përkrahin LDK-në e Vjosa Osmanin në këto zgjedhje.

Mbetën jashtë listës së kandidatëve për deputetë nga radhët e LDK-së, por – fëmijët e ish-presidentit dhe kryetarit të LDK-së, Ibrahim Rugova, nuk po e përkrahin partinë në këto zgjedhje.

“Fryma Rugoviane”, e Lidhjes Demokratike të Kosovës që në këto zgjedhje ka zënë vendin e kryefjalës në ligjërimin e tyre politik, nuk i ka marrë me vete të bijtë e ish-presidentit Ibrahim Rugova.

Teutë, Mendim e Ukë Rugova siç duket janë distancuar nga Lidhja Demokratike e Kosovës në këto zgjedhje dhe këtë më së miri e dëshmon mos-përfshirja e tyre në listën zgjedhore, shkruan lajmi.net.

Ukë Rugova, djali i madh i ish-Presidentit Ibrahim Rugova ushtron detyrën e Anëtarit të Këshillit te Përgjithshëm të Lidhjes Demokratike të Kosovës por ai nuk duket shumë i angazhuar.

Hera e fundit kur Ukë Rugova u pa në opinion së bashku me LDK-në ishte Kuvendi Qendror i zgjedhjeve të brendshme të kësaj partie, por që nga ajo ditë, Rugova nuk shihet më.

Tani kur partitë politike kanë hyrë në ditën e katër të fushatës, ai nuk është parë asnjëherë në asnjë tubim, e madje, ai nuk ka publikuar asgjë as në profilin e tij në Facebook që lidhet me partinë e babait të tij, të cilës i sherbeu edhe vet.

Përveç Ukë Rugovës, as ish-deputetja e Lidhjes Demokratike të Kosovës, Teuta Rugova, e bija e presidentit Ibrahim Rugova nuk është parë pranë partisë së saj.

Ajo, nuk është parë në asnjë tubim të Lidhjes Demokratike të Kosovës as në para-fushatë e as gjatë këtyre 3 ditëve të plota të fushatës, shkruan lajmi.net.

Lidhja Demokratike e Kosovës dhe Teuta Rugova kishin prishur marrëdhëniet në vitin 2017, kur kjo e fundit votoi pro në formimin e qeverisë Haradinaj.

Që nga ajo kohë, Rugova në publik ishte shfaqur rrallë – e tash në zgjedhjet e jashtëzakonshme ajo u la edhe jashtë listës së deputetëve.

Përveç kësaj, Rugova në profilin e saj në Facebook nuk ka asnjë simbolikë që tregon se ajo është në mbështetje të Vjosa Osmanit apo Lidhjes Demokratike të Kosovës.

Madje, postimi i saj i fundit në Facebook është ai i vitit 2017 ku ajo sqarohet rreth deklaratave të dhëna për media që e kishin kritikuar rreth qëndrimit të saj pro qeverisë Haradinaj.

As djali tjetër i ish-presidentit Ibrahim Rugova nuk ka dhënë asnjë sinjal tash e disa kohë.

Mendim Rugova, nuk është parë pranë Lidhjes Demokratike të Kosovës tash e sa kohë – kështu duke mos marrë pjesë në asnjë tubim të kësaj partie.

Ai nuk morri pjesë as në takimet e partisë, e madje as në platformat online të cilat janë shndërruar në një formë të re të fushatës elektorale, Mendim Rugova nuk qëndron pranë partisë së tij.

Rugova në profilin e tij në Facebook nuk ka vendosur as qoftë edhe një fotografi ose postim që lidhet me Lidhjen Demokratike të Kosovës apo me kandidaturën e Vjosa Osmanit për kryeministre.

Vjosa Osmani nëpër tubimet elektorale të Lidhjes Demokratike të Kosovës, si kandidate për kryeministre vazhdimisht i referohet “rugovizmit” si ideologjia politike e LDK-së.

Por, ajo që bie më tepër në sy është se asnjëri nga fëmijët e presidentit Rugova, e prej nga ku të rinjtë e LDK-së pohojnë se janë inspiruar, nuk po i qëndrojnë pranë Vjosa Osmanit.

Ky bojkotim i fëmijëve të Rugovës ndaj Osmanit dhe Lidhjes Demokratike të Kosovës, nuk ka marrë deri më tani shpjegimin e duhur asnjëherë.

Kanë qarkulluar zëra se për shkak të mospajtimeve brenda LDK-së, kanë ndodhur të tilla përçarje që kanë bërë familjen Rugova të distancohen nga krerët e partisë, por kjo nuk është konfirmuar asnjëherë.

Mbetet të shihet deri në fund të fushatës dhe pas zgjedhjeve nëse dikush nga ata do të dalë në publik dhe të deklarohet për gjithë këto kohë heshtje e bojkotim në këto momente kur “rugovizmi”, po përmendet nga çdo anëtar i Lidhjes Demokratike të Kosovës. /Nehat Sadiku/Lajmi.net/