Presidenti i Turqisë, Recep Tayyip Erdoğan deklaroi se me operacionin “Burimi i Paqes” në vetëm 8-9 ditë janë shkatërruar planet e ndyra 8 vjeçare, raporton AA.
“Vendi ynë me operacionin ‘Burimi i Paqes’ në vetëm 8-9 ditë shkatërroi planet e ndyra 8 vjeçare. Nuk do t’i harrojmë ata që mbështesin vrasësit e marrë me qira dhe ata që marrin nën patronazh terroristët kundër Turqisë. Këto në histori do të regjistrohen si të tilla”, tha Erdoğan gjatë një konference për media në aeroportin Esenboğa në Ankara para nisjes për vizitën e tij që do të zhvillojë në Hungari.
Lidhur me sportistët që përfaqësojnë Turqinë jashtë vendit, Erdoğan ka bërë të ditur se ata po përpballen me fushatë sistematike linçimi që nga fillimi i operacionit “Burimi i Paqes”.
“Kundërshtojmë qëndrimin diskriminues, të padrejtë dhe politik të UEFA-s ndaj kombëtares dhe ekipeve tona të tjera. Kur bëhet fjalë për Turqinë, sportistët e Turqisë, atmosfera ndryshon. UEFA të bëjë kthim sa më parë nga ky gabim. Ata me vendimet e gabuara nuk duhet të politizojnë më shumë sportin. Cilësimi si një sjellje provokative politike e përshëndetjes ushtarake që sportistët turq bëjnë për ushtarët tanë pas një suksesi, është përtej një standarti të dyfishtë, është një paligjshmëri. Sepse deri më tani nuk është ndërmarrë ndonjë veprim, për futbollistin që po këtë përshëndetje e ka bërë para Macron-it, apo kundër ndonjë futbollisti tjetër që ka bërë të njëjtën përshëndetje”, tha Erdoğan.
Ai foli për marrëveshjen e arritur mes Turqisë dhe SHBA-ve për rajonin në verilindje të Sirisë. “Ata që na premtuan se YPG/PYD, DEASH dhe PKK janë tërhequr ose do të tërhiqen brenda 120 orëve, aktualisht nuk e kanë bërë këtë”, tha presidenti turk.
Sipas tij, edhe marrëveshja e arritur me Rusinë për tërheqjen e YPG/PKK-së nga zonat që kontrollojnë nuk është zbatuar.
Në lidhje me sulmet që kryen organizata terroriste, Erdoğan tha: “Aktualisht terroristët kanë sulmuar Ushtrinë Kombëtare Siriane (SNA). Këtë mëngjes kanë rënë dëshmorë 11 prej tyre. Sigurisht që më pas edhe nga pala përballë janë vrarë më shumë se këto. Derisa terroristët sulmojnë, SNA dhe forcat tona nuk do të qëndrojnë pa u përgjigjur, sigurisht që do të japin kundërpërgjigje të shumëfishtë”.
Ai theksoi se Turqia do të vazhdojë të zbatojë marrëveshjet e arritura. “Mbrëmë zhvilluan një bisedë telefonike me presidentin Trump. Poashtu do të zhvilloj përsëri një vlerësim të situatës edhe me presidentin Putin”, tha Erdoğan.
Lidhur me hapat që Turqia ka ndërmarrë në luftën kundër organizatës terroriste, Erdoğan tha se “Deri më sot Turqia ka vendosur ndalimin e hyrjes në vend për 76 mijë anëtarët të DEASH-it. Prej tyre 7.550 janë deportuar ndërsa në burgje ndodhen aktualisht 149 anëtarë të DEASH-it”.
Erdoğan shtoi se të kapurit nga pjesëtarët e familjes së Al-Baghdadit janë dërguar në qendrat e rikthimit, ku do të qëndrojnë deri në marrjen e një vendimi nga Ministria e Drejtësisë. Pranë bashkëshortes së Baghdadit ndodhet një fëmijë për të cilin është konfirmuar ADN-ja. Procedurat e hetimit janë në vazhdim.
Presidenti Erdoğan, pas konferencës për media u nis për vizitën e tij që do të zhvillojë në Hungari./AA/
Discussion about this post