Presidenti i Iranit, Hassan Rouhani, tha të mërkurën se është i lumtur që Trumpi po largohet nga pushteti, duke e cilësuar si presidentin më të papërmbajtur amerikan dhe terrorist.
“Nuk jemi të stërkënaqur për ardhjen e Bidenit, por jemi të gëzuar për largimin e Trumpit”, tha Rouhani gjatë një fjalimi të transmetuar në televizion, shkruan Reuters, transmeton Gazeta Express.
Ndryshe, raportet edhe ashtu të tensionuara mes Shteteve të Bashkuara dhe Republikës Islamike të Iranit janë përkeqësuar disa herë gjatë qëndrimit të Trumpit në krye të shtetit më të fuqishëm në botë.
Fillimisht, marrëdhëniet u tensionuan kur Trumpi vendosi që t’i tërheqë Shtetet e Bashkuara nga marrëveshja e fuqive të mëdha me Iranin për kufizimin e programit bërthamor në këmbim të largimit të sanksioneve ekonomike.
Më pas, më 3 janar 2020, me urdhrin e Trumpit, forcat amerikane e vranë përmes një sulmi me dron komandantin iranian të forcave Quds, Qassem Soleimani, duke i rritur tej mase tensionet dhe duke rrezikuar që situata të dilte jashtë kontrollit.
Shtetet e Bashkuara e kishin akuzuar Soleimanin për organizimin e sulmeve kundër forcave amerikane në disa vende të Lindjes së Mesme.
