Këtyre ditëve shtëpia botuese me renome gjithkombëtare e më gjerë Logos-A nxori në tregun kulturor Fjalorin e Marrëdhënieve Ndërkombëtare dhe të Diplomacisë të autorëve Ahmet Emin Dağ dhe Ali Pajaziti, me mbi 600 faqe tekst, që siç shprehet recensenti, ambasadori kosovar Kiçmari, “ka karakter shkencor dhe përmbledh një numër të gjerë prej rreth 15, 000 nocionesh, temash, ngjarjesh dhe teorish të marrëdhënieve ndërkombëtare dhe diplomacisë.”
Sipas tij, me gjuhë me nivel, strukturë të lakmueshme dhe shpjegime koncize, ky fjalor është shumë i rëndësishëm për ata që merren me studimin e marrëdhënieve ndërkombëtare dhe diplomacisë, si dhe për ata që interesohen ose punojnë në institucione të përfaqësimit diplomatik.
Sipas Pajazitit, historia e këtij Fjalori shkon pas deri në vitin 2015. Kjo vepër është përditësuar edhe me me zëra të rinj, edhe me ata që kanë të bëjnë me “kontekstin shqiptar”. Versionit të parë i është shtuar 19 % tekst, mbi 50 “figura madhore të diplomacisë dhe marrëdhënieve ndërkombëtare”, nga Machiavelli e Richelieu, deri te Grotius, Metternich, Kissinger, Brzezinski, Hammarskjöld, Nye, Primakov, Bildt e Allbright, me institucione me peshë globale në këto dy sfera si Brookings Institution, Chatham House, Carnegie Endowment for International Peace, Cato Institute, Rand Corporation, The Fund For Peace, The Middle East Institute, me zëra si Deklarata e Pavarësisë e Kosovës, diplomacia digjitale, diplomacia energjitike, diplomacia e modës, feminizmi në marrëdhëniet ndërkombëtare, etj.
Kjo vepër kapitale do t’iu hyjë në punë ligjëruesve dhe studentëve diplomacisë e marrëdhënieve ndërkombëtare, përfaqësuesve diplomatikë, ministrive të punëve të jashtme, analistëve të kontekstit ndërkombëtar, studiuesve dhe të gjithë njerëzve që e duan shkencën dhe duan të kenë në sirtaret e veta një vepër enciklopedike.
Discussion about this post