Edhe Kadri Veseli premton rrugë, flet për një të tillë alternative në Suharekë!

Kandidati për kryeministër nga Partia Demokratike e Kosovës, Kadri Veseli, ka premtuar sot në Suharekë se gjatë qeverisjes së tij të ardhshme do të vendosë në buxhet të Kuvendit të Kosovës ndërtimin e një rruge alternative, për bizneset atje.

Ky premtim i Veselit erdhi gjatë vizitës së tij në ndërmarrjen “Frutex”, ku pronari i saj Shaqir Palushi, kërkoi nga qeveria e ardhshme ndërtimin e një rruge alternative, pasi në mungesë të saj po rrezikohen nxënësit.

Gjatë kësaj vizite, Veseli përsëriti se në krye të objektivave të tij si kryeministër ka luftimin e korrupsionit dhe nepotizmit.

“Ka vetëm një drejtim. Ka vetëm një orientim, ekonomia e lirë e tregut, ndërmarrësia e fuqishme, njerëz si Shaqa, dhe orientimi euroatlantik. Ndalja në maksimum, zero tolerancë ndaj korrupsionit dhe nepotizmit, krijimi i perspektivës për njerëzit që jetojnë ndershmërisht”, u shpreh ai.

Pronari i kompanisë “Frutex”, Shaqir Palushi, tha se produktet e tyre janë të pranishme në 30 vende, ndërsa kanë mundësi edhe më të mëdha të zgjerimit.

Ai tha se si kompani janë tatimpagues të rregullt, porse nuk kanë pasur mbështetjen institucionale. Për këtë, ai parashtroi dy kërkesa kryesore për qeverinë e ardhshme.

“Kërkesa jonë e parë për qeverinë e ardhshme është ndërtimi i një rruge alternative, e cila ekziston. Ndoshta nuk është ndonjë kosto, madje atë kosto ndoshta do ta përballonim dhe ne, mjaft po japim përmes taksave që paguajmë dhe mendoj që qeveria dhe institucionet e kanë për obligim të na ofrojnë kushtet. Po ashtu, presim prej qeverisë të re që ta fuqizojë ligjin, dhe të jetë më afër prodhuesit si segment strategjik për zhvillimin e vendit”, ka thënë ai.

Në këtë pikë, pretendenti për kryeministër Kadri Veseli, premtoi se gjatë qeverisjes së tij ndërtimi i rrugës alternative do të jetë në projekt buxhetin e vitit të ardhshëm.

“Unë po ta jap fjalën se do t’i kryejmë dhe keni për ta parë vetë se kemi me i kryer. Jo me fjalë, por me këto media që janë. Do ta kryejmë dhe s’do ta lëmë me muaj e vite, proceduralisht mos të ketë keqpërdorim, ama puna do të kryhet. Po ta jap fjalën, në 2020-ën ka me qenë në buxhet të Kuvendit të Republikës të Kosovës, rrugë alternative, jo nga fshati, këtej nga shkojnë fëmijët”, tha Veseli.

Kandidati për kryeministër i PDK-së, Kadri Veseli po qëndron në Suharekë, ku po takohet me përfaqësues të bizneseve./KP/Telegrafi/