Në presidencën e Bosnjës, sipas mediave boshnjake, të martën është shpërfaqur një dramë e vërtetë. Anëtari serb i presidencës boshnjake, Milorad Dodik ka paraqitur kërkesën për mbajtjen e një takimi të jashtëzakonshëm, për zhvendosjen e ambasadës boshnjake nga Tel Avivi për në Jerusalem.
Kurse anëtari kroat i presidencës, Zhelko Komshiç, ka kërkuar seancë të jashtëzakonshme me propozimin që Bosnja ta njohë Kosovën.
Dodik dërgoi i pari kërkesën për mbajtjen e një seance të jashtëzakonshme, raporton portali Klix.ba. Kërkesa e tij kishte vetëm një pikë: “Propozim-vendim për ndërrimin e selisë së ambasadës së Bosnjës në shtetin e Izraelit”.
Kjo kërkesë kishte ardhur pasi dy anëtarët tjerë të presidencës së Bosnjës, Shefik Xhaferoviç dhe Zhelko Komshiç kishin vlerësuar publikisht se propozimi i Dodikut rreth zhvendosjes së ambasadës nga Tel Avivi është kërkesë populiste dhe joreale.
Sipas dokumenteve të siguruara nga portali Klix.ba, është kërkuar që seanca të mbahet të mërkurën në orën 11.
Është interesante megjithatë se ndërkohë është paraqitur edhe kërkesa për mbajtjen e një takimi tjetër të jashtëzakonshëm të presidencës së Bosnjës, në orën 10:45, vetëm 15 minuta para takimit të kërkuar nga Milorad Dodik.
Në të vërtetë, fjala është për kërkesën e kabinetit të anëtarit të presidencës boshnjake, Zhelko Komshiç. Nga kabineti i Komshiçit është kërkuar që në atë takim të jashtëzakonshëm të diskutohet rreth “Propozim-vendimit për njohjen e Republikës së Kosovës”.
