Gazetarja Adelheid Wolfl, në një shkrim të publikuar në të përditshmen austriake, “Der Standard”, ka thënë se presidenti i Kosovës, Hashim Thaçi, ishte i gatshëm për një “marrëveshje të ndyrë” me Serbinë, bashkë me Richard Grenellin.
“Është interesante që në lidhje me akuzat kundër Thaçit, në Kosovë dhe në qarqe diplomatike ditëve të fundit janë përhapur thashetheme se presidenti është i gatshëm të arrijë një ‘marrëveshje të ndyrë’ me të dërguarin e Trumpit, Richard Grenell, i cili është përgjegjës që të punojë për Serbinë dhe Kosovën, vetëm për t’iu shmangur akuzave para gjykatës. Për shkak të historisë së tij me luftën, Thaçi ka qenë i shantazhueshëm për shumë vjet. Ndërkaq Grenelli, nga ana tjetër, është i gatshëm të arrijë një marrëveshje mes Serbisë dhe Kosovës – pa dashjen e BE-së, e cila është ngadalësuar – për t’i dëshmuar Trumpit se ai është ‘marrëveshjebërësi’ dhe për t’u bërë këshilltar i sigurisë i Trumpit apo ministër i Jashtëm në mandatin e dytë”, ka shkruar “Der Standard”, transmeton Zeri.info.
Takimi i planifikuar i 27 qershorit në Shtëpinë e Bardhë, sipas kësaj gazete, do të ishte nisja e një marrëveshjeje mes dy vendeve, për çka negociatori i BE-së, Mirosllav Lajçak është përgjegjësi i vërtetë, e i cili vetëm pak ditë më parë qëndroi edhe në Kosovë edhe në Serbi.
Ndërkaq, Komisioni Evropian pret të dialogu i iniciuar nga BE-ja për normalizim të raporteve Kosovë-Serbi të rinis në korrik siç është planifikuar, edhe përkundër ndryshimeve të fundit. Të dy palët janë pajtuar paraprakisht se ka “nevojë të jashtëzakonshme” për vazhdimin e dialogut.
Gazeta austriake më tej shkruan se “Thaçi vazhdimisht ka bërë thirrje për ndryshime të kufijve para nisjes për në Washington”.
“I ashtuquajturi shkëmbim i territoreve, për ç’gjë Thaçi dhe Vuçiqi ishin pajtuar disa vite më parë dhe përmes së cilës komunat me shumicë serbe në veri të Kosovës në të ardhmen do t’i takonin Serbisë, ndërsa komunat me shumicë shqiptare në Serbi, Kosovës, bie ndesh me Kushtetutën e Kosovës dhe me ligjin ndërkombëtar”, ka shkruar gazetarja Adelheid Wölfl në shkrimin e publikuar në “Der Standard”.
