Kryeministrja e Serbisë, Ana Bërnabiq, thotë se Kosova është izoluar në të kaluarën dhe se është koha që t’i kthehet së ardhmes.
Ajo tha se të gjithë e dinë se si është gjendja në Kosovë dhe se po të ishte në vendin e krerëve të shtetit të Kosovës nuk do të ndihej krenare për situatën.
“Ajo çfarë ata festojnë sot është e tyre. E dimë si është gjendja në Kosovë e Metohi dhe po të isha në vendin e tyre nuk do të krenohesha me të”, tha Bërnabiqi, duke iu përgjigjur pyetjes se a është i mundshëm dialogu në mes të dy vendeve mes “provokimeve të vazhdueshme të Prishtinës”, raporton gazeta “Blic” e Beogradit.
Kryeministrja serbe shtoi se Kosova në këtë moment, sipas të dhënave të OKB-së, është territori ku janë kthyer më së paku të shpërngulurit dhe refugjatët në shtëpitë e tyre.
“Këtë lloj shoqërish kanë arritur ta krijojnë institucionet e përkohshme në KeM në më shumë se 10 vjet. Ky është tregues i demokracisë së tyre, i respektimit të shtetit të së drejtës dhe i të drejtave të njeriut dhe të pakicave”, tha ajo gjatë një ngjarjeje në Beograd, transmeton “Zeri.info”.
“Ne do të tentojmë të mbrojmë interesat dhe Kushtetutën e Serbisë. Nga ana tjetër, ne dërgojmë mesazhe paqeje, stabiliteti e të ardhmeje. Shpresoj që nga institucionet e përkohshme në Prishtinë të kemi bashkëbisedues adekuatë, që heqin dorë nga e kaluara e i drejtohen së ardhmes”, tha kryeministrja serbe, Ana Bërnabiq.
