Ato që janë nënshkruar në Washington nga Kosova dhe Serbia nuk kanë asgjë historike, përveç ndoshta njohjes së pavarësisë së Kosovës nga Izraeli. Kështu ka thënë Agron Bajrami, kryeredaktor i KOHËS, në një intervistë dhënë gazetës kroate “Slobodna Dalmacija”.
“Marrëveshja prezantohet si historike ndoshta për shkak se kjo ndodhi në Shtëpinë e Bardhë, dhe ndoshta sepse kështu i përshtatet administratës aktuale amerikane marrë parasysh se së shpejti i kanë zgjedhjet”, ka thënë Bajrami. Por, sipas tij, kur lexohen letrat e nënshkruara, aty nuk shihet ndonjë përparim historik në raportet Kosovë-Serbi, “por më shumë bëhet fjalë për çështje beninje, siç është ndërtimi i autostradave dhe pjesëmarrja në mini-Schengen zonë”.
“Ajo që është më interesante në këto letra nuk ka të bëjë me raportet mes Kosovës dhe Serbisë, por ka të bëjë me Izraelin, rrjetin 5G, shpalljen e Hezbollahut organizatë terroriste dhe zhvendosjen, përkatësisht hapjen e ambasadës në Jerusalem. Kjo i hap disa çështje të tjera, nuk do t’i quaja me rëndësi historike, por them se ato mund të kenë ndikim gjeopolitik në gjithë rajonin”, ka thënë Bajrami.
Sipas tij, marrëveshja e arritur në Washington është edhe pasojë e pafuqisë së Bashkimit Evropian që për gjithë këto vite të dialogut ta mbyllë çështjen mes Kosovës dhe Serbisë. “Të mos harrojmë se administrata e Trumpit sapo ka marrë mandatin, në tavolinë e ka gjetur problemin mes Kosovës dhe Serbisë, sepse Bashkimi Evropian e ka zvarritur dhe nuk ka arritur deri tek synimi, normalizimi i marrëdhënieve përmes një marrëveshjeje ligjërisht obliguese”, ka thënë Bajrami.
“Nga viti 2011 po negociohet në Bruksel dhe rezultatet janë shumë të dobëta. Andaj dhe ishte e pritshme që Washingtoni do të hyjë në këtë storie duke u përpjekur, natyrisht, që këtë ta shfrytëzojë edhe për vete, andaj dhe aty gjenden pika që kanë të bëjnë me ndikimin rus në këtë rajon, Izraelin, Lindjen e Mesme…”, tha kryeredaktori i KOHËS.
“Por, po e përsëris, ky është rezultat edhe i pafuqisë së BE-së që të merret me këtë proces më seriozisht apo ndoshta edhe rezultat i faktit që vetë BE-ja, në një moment, ka dalë nga rruga dhe ka nisur të negociojë për këmbimin e territoreve dhe gjëra të ngjashme”.
Sipas Bajramit, e tërë çështja e këmbimit të territoreve dhe e ndryshimit të kufijve është ndalur për shkak se ka hasur në rezistencë të madhe, si në Kosovë dhe rajon, ashtu edhe në botë, dhe në administratën amerikane kjo gjë është vërejtur.
“Kjo gjë do t’ua hapte dyert komplikimeve të shumta jo vetëm mes Kosovës dhe Serbisë, por edhe në rajon. Në Bosnjë-Hercegovinë ka kohë që shohim tendenca të tilla nga Republika Srpska dhe Milorad Dodiku”, ka thënë Bajrami.
