Në ditën e parë të seancës përfundimtare të procesit gjyqësor “Syri i Popullit”, avokati mbrojtës i të akuzuarit, Sadri Ramabaja, Ramiz Krasniqi e ka quajtur procesin gjyqësor me motive politike dhe me plot parregullsi.
Ai ka akuzuar presidentin Hashim Thaçi, ish-kryeparlamentarin Kadri Veseli dhe Adem Grabovcin se me dëshmitë e tyre kanë dashur të eliminojnë politikisht klientin e tij.
“Ky proces gjyqësor do të mbahet mend si proces i parë pas luftës, i pastër me motive politike, ku erdhën për të dëshmuar krerë të pushtetit dhe jo për të dëshmuar siç i obligon ligji”, ka thënë Krasniqi.
Ai ka numëruar shkeljet që ka lejuar gjykata gjatë procesit. Sipas avokatit Krasniqi, trupi gjykues ka bërë shkelje në momentin që ka lejuar të mbahet e mbyllur seanca ku dha dëshminë e tij presidenti Thaçi dhe që ka lejuar që t’i bëjë pyetje të drejtpërdrejta të akuzuarit.
“Arsyeja pse është akuzuari Sadri Ramabaja nuk i keni në dëshmitë e prokurorit, por në dëshmitë e Hashim Thaçit, Veselit e Adem Grabovcit, të cilët kishin ardhur jo të dëshmojnë, por do e eliminojnë Sadri Ramabajën nga skena politike. Hashim Thaçi tregoi botërisht se kjo aktakuzë është e tij. Rasti “Syri i popullit” është i montuar”, tha ai./KosovaPress/
