Emërimi i djalit të deputetit të AAK-së, Haxhi Shala, Flakron Shala në pozitën e Konsullit të Përgjithshëm në Pragë, nxiti reagime të shumta tek publiku, partitë politike dhe shoqëria civile për mënyrën se si ishte bërë emërimi
Madje për këtë gjë reagoi edhe kryeministri Avdullah Hoti, i cili tha se për këtë emërim është njoftuar nga mediat dhe se i njëjti nuk është kryer në koordinim me të.
“Për emërimin e Konsullit të Përgjithshëm të Republikës Kosovës në Pragë të Çekisë, jam njoftuar nga mediat. Ky emërim nuk është koordinuar me mua. Qeveria është në proces të analizimit dhe rishikimit funksional të rrjetit të misioneve diplomatike”, shkruajti Hoti në një postim në Facebook.
Por në dekretin e ish Presidentit Hashim Thaci për emërimin e Flakron Shalës si Konsull i Përgjithshëm në Çeki, që mbanë datën 20 tetor 2020 shihet se dekreti i është dërguar kryeministrit Hoti dhe kabinetit të tij.
Telegrafi ka kontaktuar me zyrën për media të Kryeministrit, por të njëjtit kanë thënë se nuk kanë çfarë të shtojnë më shumë se atë që ka deklaruar vetë kryeministri Hoti në postim në Facebook. /Telegrafi/
