Nënkryetarja e Kuvendit, Arbërie Nagavci ka deklaruar sot se delegacioni i Kosovës që do të shkojë në Uashington për bisedime me Serbinë, nuk e ka ende të qartë arsyen e vizitës.
Në një shkrim në Facebook, Nagavci ka thënë se edhe kryeministri Avdullah Hoti e ka bërë dje të qartë se nuk ka agjendë për temat që do të diskutohen në Shtëpinë e Bardhë.
“Qeveria Kurti, hoqën dorë vullnetarisht nga e drejta për të aplikuar në organizata ndërkombëtare, pra dobësuan pozicionin e Kosovës, tani po bëhen gati të shkojnë në Ëashington, ndonëse akoma nuk e dinë as vet se cila është arsyeja e vizitës. Zt. Hoti dje e bëri të qartë se ai nuk është i njoftuar as për ndonjë axhendë, as për temat sa i përket takimit të 27 qershorit në Shtëpinë e Bardhë, përderisa Presidenti Thaçi ndërkaq po vazhdon të jap sinjale të qarta për atë që ka planifikuar tashmë”, ka shkruar ajo.
Sipas të njejtës, ngjarjet këto ditë po ndodhin me shpejtësi, e sipas asaj duhet që të mbrohet Kosova nga kjo qeveria të cilës i referohet si “jolegjitime”
“Ngjarjet po ndodhin me shpejtësi këto ditë, vendim pas vendimi secili më i keq se tjetri. Sapo mendon se e kanë prekur fundin, shef se paska dhe më keq. Kjo Qeveri e Thaçit nuk mund të na befasojë, duhet vetëm vëmëndje e kujdes, e duhet dhe shkathtësi të mbrojmë vendin nga kjo Qeveri jolegjitime. Një ditë mund të jetë shumë vonë, vonë për ne, se zt. Hoti dhe kolegët e tij, tashmë kanë vendosur jo vetëm për të tashmen, por edhe të ardhmen e tyre dhe këtë do ta kuptojnë shumë shpejtë. Ne duhet të kemi kujdes për vendin, për veten, për të ardhmen tonë. S’mund të bëhemi pjesë e skenarëve të rrezikshëm e veprimeve jotransparente. Andaj dhe dje në mledhje të Kryesisë së Kuvendit kam kërkuar që të ftojmë në raportim dhe debat në Kuvend, zt. Hoti para se të niset në këtë udhëtim, kërkesë që u përkrah nga Kryesia”, ka thënë ajo.