Albulena Haxhiu jep detaje nga takimi Kurti-Osmani, ja kur do të arrihet marrëveshja e madhe!

Dy partitë e para të dala nga zgjedhjet e 6 tetorit, po vazhdojnë bisedimet e tyre intensive për të arritur një marrëveshje për bashkëqeverisje.

Një takim i ngjashëm, dhe jo i paralajmëruar ka ndodhur edhe sot në mes të liderit të Lëvizjes Vetëvendosje, Albin Kurti, dhe nënkryetares së LDK-së, njëherit edhe kandidate për kryeministre nga kjo parti, Vjosa Osmani.

Për këtë takim, shkurtimisht foli vetëm lideri i VV-së, Albin Kurti, shkruan gazeta “Bota sot”.

Kurti pa dhënë shumë detaje zbuloi se me Vjosa Osmanin biseduan për përgatitjet për qeverisjen e re dhe sfidat që po i presin.

Ndërsa, lidhur me ketë takim, për gazetën “Bota sot”, ka folur Albulena Haxhiu, ish-deputete e Kuvendit të Kosovës.

Ajo në një përgjigje për gazetën “Bota sot”, ka thënë se takimi mes Kurtit dhe Osmanit ka qenë në vazhdën e takimeve me qëllim për bashkëqeverisjen e ardhshme.

“Takimi i sotëm ka qenë në vazhdën e takimeve me qëllim bashkëqeverisjen e ardhshme. Takimet tona po mbahen në një fryme shumë pozitive dhe jemi optimiste për koalicionin e përbashkët qeverisës”, ka thënë fillimisht Haxhiu.

Me tej, ajo ka deklaruar se planifikimet e tyre janë se harmonizimi për programin qeverisës të përfundojë javën e ardhshme.

“Planifikimet tona janë që harmonizimi për programin qeverisës të përfundojë javën e ardhshme. Nesër e kemi takimin e radhës. Nëse vazhdohet me ketë intensitet, marrëveshja mund te arrihet shumë shpejt”, ka përfunduar ish-deputetja e Kuvendit të Kosovës nga radhët e Lëvizjes Vetëvendosje, Albulena Haxhiu, për gazetën “Bota sot”.