Administrata Trump kundër sanksioneve ndaj Turqisë!

Administrata e Presidentit të Shteteve të Bashkuara të Amerikës, Donald Trump, po bën përpjekje për të kundërshtuar projektrezolutën që parashikon sanksionimin e Turqisë për blerjen e raketave ruse “S-400”, sipas portal informativ “The Daily Beast”.

“The Daily Beast”, me seli në Nju-Jork, ka arritur të sigurojë memorandumin prej 7 faqesh që Departamenti amerikan i Shtetit u ka dërguar senatorëve për p/rezolutën, e cila parashikon sanksione kundër Turqisë (për blerjen e sistemeve të mbrojtjes ajrore “S-400” nga Rusia) dhe pret të miratohet nga Senati.

Sipas dokumentit në fjalë, administrata Trump argumenton se tregtia Turqi-SHBA në fushën e mbrojtjes do të marrë fund plotësisht nëse kjo p/rezolutë miratohet.

Pasi tërhiqet vëmendja se me një ligj të tillë në fuqi marrëdhëniet turko-ruse do të avancojnë edhe më shumë ose Turqia do t’u afrohet “furnizuesve të tjerë armiq të armëve” për të blerë armatime, në memorandumin e Departamentit të Shtetit në adresë të senatorëve vlerësohet se “ky ligj është gjithashtu një sjellje sikur Turqia të ishte përjashtuar nga NATO-ja”.

Portali “The Daily Beast” citon edhe një zëdhënës të Departamentit të Shtetit të ketë lavdëruar anëtarësinë dhe rolin e Turqisë në Aleancë.

“NATO-ja është më e fortë me Turqinë si anëtare dhe e tillë ka qenë për gati 70 vjet. Turqia ka qenë për dekada një kontribuuese e rëndësishme për sigurinë kolektive të NATO-s”, ka thënë zëdhënësi.

Memorandumi në fjalë i Departamentit të Shtetit kundërshton po ashtu p/rezolutën që parashikon pajisjen e terroristëve anëtarë të Forcave Demokratike Siriane (SDF) dhe të organizatës terroriste separatiste YPG/PKK, të ashtuquajtur “luftëtarë kurdë që luftojnë në krah të ushtarëve amerikanë”, me “vizë speciale imigruese”.

Komiteti i Marrëdhënieve të Jashtme të Senatit të SHBA-së miratoi më 11 dhjetor p/rezolutën për sanksionimin e Turqisë për shkak të blerjes së raketave “S-400” nga Rusia dhe hapave të saj në Siri.

Një tjetër p/rezolutë që parashikon sanksione kundër Turqisë u miratua më 29 tetor edhe në Dhomën e Përfaqësuesve të SHBA-së.

Në rast se miratohet edhe në seancën plenare të Senatit, p/rezolutat për sanksione të Dhomës së Përfaqësuesve dhe Senatit duhet të bashkohen përpara se të mbërrijnë në tavolinën e Presidentit Trump.