Analisti i njohur politik, Faton Abdullahu, ka thënë se Kryeministri Albin Kurti duke shkuar në punë në këmbë po ngazëllon me fore ata që nuk e kanë idenë se pa koordinim të plotë me SHBA’në, puna e tij do të vihet në pikëpyetje.
Përmes një shkrimi në rrjetin social Facebook, Abdullahu ka thënë se Qeveria Kurti do të duhej të hiqte taksën 100 përqind.
“Ndërkohë Kurti do të shkoj këmbë në punë dhe ata që ngazëllehen me këtë fore nuk e kanë idenë se pa heqjen e taksës, pa koordinim të plotë me SHBA-t mbi dialogun me Serbinë, puna e Kurtit, dhe puna e të mirave të Kosovës do të vihen në pyetje gjithnjë e më shumë. E keqaja që po i ndodh Kosovës brenda kohës sa po ndodh refuzimi i heqjes së taksës, po rritet shpejt si ortek bore”, ka shkruar ai.
Shkrimi i plotë:
Sot Qeveria e Kosovës do të duhej të dal me qëndrim unik për taksën. Por qëndrim unik Qeveria Kurti nuk ka. Ai qëndrim do të duhej të ishte heqja e saj. Por ka vetëm një arsye pse kjo nuk po ndodh. Qeveritarët aktual, sidomos LV –ja, me qasjen e saj tradicionale dhe të gjatë për nga koha ja ka lidhur vetes këmbët, përveç tjerash edhe duke konstatuar vazhdimisht se votat i kanë fituar edhe mbi këtë kauzë refuzimi e ndëshkimi ndaj Serbisë.
Prandaj këto ditë Qeveria Kurti nuk po e heq taksën por po pret që të rritet edhe më trysnia për heqjen e saj edhe nga faktori ndërkombëtar, sidomos SHBA-t, të rritët trysnia edhe nga faktori i brendshëm, sidomos nga partneri LDK, me qëllim që më pas heqja e taksës të duket dhe të ofrohet si reagim pragmatik i Kurtit ndaj rrethanave të reja.
Ndërkohë Kurti do të shkoj këmbë në punë dhe ata që ngazëllehen me këtë fore nuk e kanë idenë se pa heqjen e taksës, pa koordinim të plotë me SHBA-t mbi dialogun me Serbinë, puna e Kurtit, dhe puna e të mirave të Kosovës do të vihen në pyetje gjithnjë e më shumë.
E keqaja që po i ndodh Kosovës brenda kohës sa po ndodh refuzimi i heqjes së taksës, po rritet shpejt si ortek bore.
