Çmimi i lartë i shkuarjes në haxh ka shqetësuar një numër të besimtarëve muslimanë në vendin tonë. Si rezultat, bri këtyre shqetësimeve, kanë filluar të përhapen spekulime se duhet ndaluar shkuarja në haxh, shkruan Kosova Post.
Në lidhje me këtë ka reaguar Dr. Mustafë Bajrami i cili ka thënë se këto spekulime janë të pavend dhe se askush nuk mund ta ndalojë shkuarjen në haxh përveç në raste shumë specifike.
“Haxhi është një prej pesë obligimeve për muslimanët. Megjithatë, sikur edhe zekati, edhe haxhi është detyrim vetëm për ata besimtarë që kanë mundësinë materiale ta kryejnë atë” ka thënë Bajrami.
Përveç kësaj, ai ka shtruar edhe pesë pika tjera të rëndësishme në lidhje me rastin.
Më poshtë gjeni shkrimin e plotë në llogarinë e tij në Facebook:
Përgjigje miqve që po më pyesin në lidhje me haxhin për shkak të çmimit (shumë) të lartë:
1- Haxhin kurrë dhe në asnjë mënyrë askush nuk mund ta ndalojë, përveç në raste shumë specifike, si lufta, pandemia, rreziku për jetë gjatë shkuarje-ardhjes e të ngjashme;
2- Haxhin e ka obligim ai që ka mundësi materiale të shkojë, natyrisht pasi t’i plotësojë konditat juridike sheriatike paraprake; të jetë musliman, i shëndoshë (mentalisht dhe fizikisht) e të ngjashme;
3- Çmimi i lartë i haxhit nuk mund të merret si shkak i ndalimit të shkuarjes në haxh, përveç në rast krize ekonomike globale për gjërat esenciale të jetesës, si buka, kripa, uji e të ngjashme. Nëse eventualisht merret ndonjë vendim-ndalese e tillë, institucionet përkatëse shtetërore në këtë rast duhet të konsulltohen dhe të koordinohen ngushtë me institucionet përkatëse islame të atij vendi;
4- Nga Shejh Bin Bazi, para disa viteve është kërkuar të lëshojë një fetva për ndalimin e organizimit të shkruarjes në haxh nga institucione apo individë privatë, e të lejojë vetëm institucionet zyrtare. Ai në mënyrë kategorike ka refuzuar duke thënë: Si është e mundur të kërkohet nga unë të ndalojë diçka që nuk e ka ndaluar Allahu i Madhërishëm?!;
5- Tek rasti konkret për ne në Kosovë, miq: Ata që nuk kanë mundësinë ta përballojnë koston (5700 euro) për shkuarje në haxh, ata lirohen nga obligimi për të shkuar në haxh. Prandaj, me gjithë dëshirën e madhe të shkojnë, të tillët nuk duhet të ndjehen keq pse nuk po mundin të shkojnë në haxh.
Allahu a’lem…!
