Ditës së Pastrimit të Botës” i bashkohen mbi 11 milionë vullnetarë!

Nga shteti i Kosovës po vazhdon koordinimi i “Ditës së Pastrimit të Botës”  në më shumë se 157 vende të ndryshme të botës. Deri më tani, vullnetarët në Qendrën e Thirrjeve kanë mbledhur të dhënat nga afro 80 vende të ndryshme, dhe numri i vullnetarëve që i janë bashkuar “Ditës së Pastrimit të Botës” deri […]

Nga shteti i Kosovës po vazhdon koordinimi i “Ditës së Pastrimit të Botës”  në më shumë se 157 vende të ndryshme të botës.

Deri më tani, vullnetarët në Qendrën e Thirrjeve kanë mbledhur të dhënat nga afro 80 vende të ndryshme, dhe numri i vullnetarëve që i janë bashkuar “Ditës së Pastrimit të Botës” deri më tani është mbi 11 milionë.

Në Qendrën e Thirrjeve, e cila gjendet në Shkollën Finlandeze në Prishtinë, vullnetarët po vazhdojnë kontaktimin e të gjitha shteteve, varësisht nga koha në zonën e tyre kohore. Së fundmi, aktivitetet e “Ditës së Pastrimit të Botës” kanë nisur edhe në Shtetet e Bashkuara të Amerikës, ndërkohë që kjo ditë kaq e rëndësishme për botën pritet të përmbyllet në Hawaii.

Aktivitetet e “Ditës së Pastrimit të Botës” po pasqyrohen edhe përmes një transmetimi të drejtpërdrejt në kanalin katërt të Televizionit Publik të Kosovës (RTK 4) dhe në rrjete sociale. Gjatë këtij transmetimi, përveç videove të shumta nga shtete të ndryshme të botës, janë shfaqur edhe materiale të shumta, përmes së cilave janë promovuar vlerat e shtetit të Kosovës në gjithë botën.

Aksioneve të pastrimit, të organizuara nga shtetet që janë pjesë e Lëvizjes globale “Let’s Do It World” iu janë bashkuar mbi 18 milionë njerëz nga 157 shtete të ndryshme gjatë vitit të kaluar, duke e shndërruar në aksionin më të madh civil kundër mbeturinave në botë. Qëllimi i kësaj lëvizje globale është që të rrisë vetëdijen për dëmet që i shkaktohen planetit tonë si pasojë e keq menaxhimit të mbeturinave, andaj është i domosdoshëm angazhimi i individëve, kompanive dhe organizatave për një botë më të mirë, më të shëndetshme dhe një mjedis më të sigurt.

Ideja pas aksioneve globale është e thjeshtë e veçantë. Çdokush mund të organizojë një aksion pastrimi, apo t’u bashkohet atyre që veçse janë organizuar, dhe natyrisht secili mund të zgjedh se çka, ku dhe sa shumë mbeturina do të mbledh.

“Dita e Pastrimit të Botës” ka tërhequr një numër jashtëzakonisht të lartë të njerëzve, të cilët e shohin këtë si mundësi që të japin kontributin e tyre për një planet më të pastër, përfshirë edhe qindra kompani dhe organizata. UNEP, UN, Habitat, Earth Day Network, Fridays For Future, Allianz, Toyota and Fujitsu janë duke pritur që t’u bashkohen aksioneve të pastrimit që do të ndodhin sot nëpër gjithë botën.

Të gjitha zhvillimet e fundit për “Ditën e Pastrimit të Botës” do të transmetohen në një program të drejtpërdrejt prej 12 orësh që ka nisur në orën 09:00 dhe do të shfaqet në Televizionin Publik të Kosovës (RTK4) dhe nëpër të gjitha rrjetet sociale. Këtë vit, “Dita e Pastrimit të Botës” koordinohet nga shteti i Kosovës, andaj, në Prishtinë është lokacioni i qendrës së thirrjeve, përmes së cilës do të kontaktohen të gjitha shtetet e botës në të cilat është organizuar aksioni.