Kryeministri Edi Rama ka reaguar pas lajmit për lirimin e tre policëve kosovarë që u rrëmbyen nga ana e Serbisë brenda territorit të Republikës së Kosovës, shkruan Gazeta Mejdani
Lideri i Shqipërisë ktë hënën me anë të një cicërime në Twitter në gjuhën angleze dhe shqipe ka thënë se kthimi i policëve të Kosovës është një lajmë i mirë po i vonuar dhe sipas tij ky veprim rihap rrugën e de eskalimit dhe të dialog.
Ai shtoi më tej se sapo ka mbërritur në Bruksel ku është takuar me Presidentin e Këshillit Evropian Charles Michel për të cilin tha se ia përcolli shqetësimet për situatën kritike në rajon e cila sipas tij kërkon mbajtjen e një konference pa afat kohorë pasi që Kosova dhe Serbia duhet të përmbyllin të gjitha pikat e marrëveshjes së normalizimit
Rama shtoi në fund edhe se fatkeqësisht palët janë fokusuar tek retorika nacionalistë të inspiruar nga sondazhet e brendshme duke rrezikuar krijimin e një “Donbasi” ballkanik në zemër të Evropës.
Postimi i plotë:
Kthimi i policëve të Kosovës në shtëpi është një lajm i vonuar, po gjithësesi shumë i mirë, sepse e para, i jep fund heqjes arbitrare të lirisë së tre njerëzve që s’kanë kryer asnjë krim dhe e dyta, rihap rrugën e de-eskalimit e të dialogut. Më vjen mirë që forca e arsyes fitoi mbi arsyen e forcës. Uroj që me forcën e arsyes të nisë menjëherë de-eskalimi i shumëpritur nga të gjithë dhe të zgjidhim më tej edhe nyjet e procesit të normalizimit përfundimtar mes Kosovës e Serbisë.
Sapo kemi mbërritur në Bruksel, ku pas pak do të takohem me Presidentin e Këshillit Europian, mikun e çmuar të Shqipërisë dhe rajonit tonë, Charles Michel. Do t’i përcjell mikut tonë shqetësimet e mëdha për situatën kritike në rajon dhe bindjen time mbi domosdoshmërinë e një konference pa afat kohor, ku të mbyllur brenda mureve të një strukture mikpritëse nën kujdesin e bashkësisë euro-atlantike, liderët e Kosovës dhe Serbisë duhet të përmbyllin krejt pikat e marrëveshjes së normalizimit.
Fatkeqësisht, së fundmi të dyja palët i kanë sytë tek fronti i politikës së brendshme dhe tek sondazhet e përflakura nga retorika nacionaliste. Ndërsa dialogut jetik për të ardhmen e krejt rajonit dhe marrëdhënieve me botën demokratike u kanë kthyer kurrizin. Ndërkohë situata në Veri degradon me orë e me minuta, duke rritur edhe mundësinë e largqoftë një “Donbasi” ballkanik mu në zemër të Europës. Kjo mundësi edhe vetëm ta mendosh është katastrofike, prandaj duhet eliminuar me çdo kusht.
Miopia strategjike në qasjen ndaj dialogut, zvarritja e planit të shkëlqyer franko-gjerman, devijimi i fokusit tek demonstrimet e forcës dhe si rrjedhojë, degradimi i situatës në Veri, mund t’i kushtojnë gjithë këtij rajoni, Serbisë padiskutim, po sidomos Kosovës më shumë se çdokujt tjetër, një kthim i mosozotshëm mbrapa, me pasoja shumëvjeçare.
Shqipëria do të bëjë çmos që kjo të mos ndodhë, sepse do të ishte një çmenduri që paqja e brishtë që kemi ndërtuar përgjatë këtyre viteve, në kuadrin e Procesit të Berlinit dhe përmes nismash të ndryshme, të rrënohet si kështjellë rëre nga rikthimi i dallgës së marrëzisë ballkanike, duke na rihedhur të gjithëve jashtë rrugës së integrimit europian, në fuçinë e vjetër të barutit në mes të Europës.
