Tema rreth shamisë sërish ka ngjallur reagime të mëdha në opinionin shqiptar. Shkak i këtyre reagimeve u bë skandali me foton e vajzës me mbulesë që u vendos në hyrje të një shkolle në Gjakovë. Mbulesa muslimane aty ishte trajtuar njëjtë sikur revolja, pirja e duhanit dhe përdorimi i drognave.
Kjo ngjarje shkaktoi reagime të mëdha ndër qytetarët e vendit. Si rrjedhojë, u bënë emisione televizive në lidhje me rastin.
Shumë qytetarë të vendit si dhe shumë shqiptarë nga trevat shqiptare reaguan duke thënë se ky veprim i shëmtuar u bë qëllimshëm në fillim të Muajit të Shenjt të Ramazanit.
Një numër jo i vogël i tyre shkruanin nëpër rrejte sociale se akte si ky bëhen vazhdimisht në vigjilje të festave fetare muslimane tek ne.
Mbrëmë, në T7, saktësisht në emisionin “Pressing” u zhvillua një debat tepër i nxehtë në lidhje me temën. Aty u dëgjuan interpretime tendencioze të shtrembëruara ndaj pozitës së shamisë në Islam si dhe u dëgjuan ofendime ndaj grave me mbulesë si dhe ndaj musafirëve në emision që mbronin të drejtës e femrës me shami për tu shkolluar.
Përveç kësaj, udhëheqësi i emisionit qëllimshëm dezorientonte temën dhe bënte përpjekje për lajthitje të të pranishmëve që mbronin shaminë.
Pyetja më provokative ishte ajo rreth Nëna Terezë dhe Mulla Idriz Gjilani. Këtë pyetje e përsëriti disa herë duke tentuar të shkaktojë sa më shumë reagime si në emision, niashtu edhe në oponionin shqiptar.
Ndaj provokimeve të udhëheqësit të këtij emisioni, që në fakt ishin provokime për të bërë përçarje midis shqiptarëve mbi baza fetare, sot ka reaguar edhe teologu shqiptar, Mustafë Bajrami.
Ai ka shprehur keqardhje ndaj asaj që shpesh ndodhë në këtë emision e sidomos ndaj qëndrimeve tendencioze të udhëheqësit të “Presing”-ut.
Për t’i ikur përçarjeve mbi baza fetare, Mustafë Bajrrami ka ftuar gjithë shqiptarët të bojkotojnë emisionin “Pressing”.
Më poshtë gjeni shkrimin e plotë në llogarinë e tij në Facebook:
Thirrje!
Besimtarëve muslimanë shqiptarë!
Kujdes të shtuar ndaj provokimeve të ulëta të televizionit T7, më saktësisht emisionit Pressing, udhëheqësit të atij emisioni dhe disa analistëve të rregullt aty, të cilët qëllimisht shtrojnë tema provokative për ta helmuar atmosferën festive tani në Muajin e Shenjt të Ramazanit, sikur që kanë vepruar edhe më parë me rastin e evinementeve tjera, për tema të tjera dhe me mysafirë të tjerë.
Pressingu i mbrëmshëm ishte kupolla e këtyre provokimeve të ulëta. Insistimi i udhëheqësit të emisionit me pyetje helmuese si, “A Nënë Tereza apo Mulla Idriz Gjilani”, nuk ishte gjë tjetër pos përpjekje për t’i lajthitur mysafirët aty e për të shkaktuar përçarje midis shqiptarëve mbi baza fetare.
Përtej kësaj, ekspozimi i vazhdueshëm në ekran i fotos së një gruaje me kokë tërësisht të mbuluar, ishte ofendim i hapur ndaj nënave, motrave e grave tona me shami. Ishte përpjekje djallëzore për t’i nënçmuar gratë me shami. Çdo gjë në atë emision ishte përgatitur për t’i nxitur njerëzit kundër femrave të mbuluara dhe për t’i helmuar zemrat e besimtarëve muslimanë të këtij vendi dhe të shqiptarëve në përgjithësi.
Prandaj, ju bëjë thirrje të bëni kujdes ndaj këtyre njerëzve duke bojkotuar këtë medium. Saktësisht këtë emision.
Falë Zotit, shqiptarët tanimë kanë hapësira tjera ku mund të përcjellin emisione kualitative. Sidomos tani në Muajin e Ramazanit kur kemi nevojë për një përkushtim më të madh ndaj Zotit, ndaj fesë, për vepra të mira dhe për një qetësi shpirtërore….!
