Ne kemi përmirësim me 30 për qind në Njësinë 10, – tha sot, Tabaku dhe Basha. Jemi rrritur me 1,200 vota dhe PS, ka humbur 200 vota. Natyrisht, tha të vërtetën. Po çfarë harroi?
Shkruan: Shpëtim Nazarko
Në kurriz të kujt, i fitoi këto vota? Po të kthente sytë nga aleati me të cilin, do të bashkëqeveriste, pra LSI, do të kuptonte, pse nuk është mirë të fliste për Njësinë 10. Ajo që ka ndodhur ,është shumë e thjeshtë. Dhuratat e bëra nga PD te LSI, nga vitet 2011 deri në 2017, filloi t’i rimerrte. Po a i ka marrë të gjitha? Duket se jo dhe rritja e PD-së është bërë në kurriz të LSI-së…
Është e qartë nga çfarë shihet deri tani, se, ky arsyetim vlen për thuajse kudo ku është numëruar.
Në shkrimin e para disa ditëve, theksoja se votat e PD-së plus LSI-së, ndryshe nga 2009-ta, janë afërsisht sa të PS-së. Por dhe po të ishin më shumë se të sajat prapë, fitorja është larg, për shkak të sistemit zgjedhor. Në 2009-ën, PS plus LSI ishin gati më shumë se 90 mijë vota mbi PD dhe prapë, nëse do të bënin aleancë me njëra-tjetrën, bënin 70 mandate, po kaq sa kishte PD e vetme.
Natyrisht që Basha, duhet kuptuar se me deklaratën e tij, u jep zemër numëruesve për të ruajtur votën deri në fund, po kjo s’ka lidhje me realitetin, apo analizën reale.
Në të njëjtin arsyetim të gabuar të Bashës, ishin dhe sondazhet e të gjitha krahëve. Nëse PD plus LSI, nuk do të merrnin shumë më tepër se PS, votë popullore, nuk fitonin dot.
Në një arsyetim të gabuar, ranë dhe exitpolet. Po këto, mendoj, për një arsye tjetër. Duket se, ashtu si dhe sondazhet, nuk kanë shkuar në fshat, ku banon ende gjysma e popullsisë. Dhe aty, pikërisht, PS duket se krijoi dhe diferencën edhe në votë popullore. Dhe në fshat, nuk munguan vetëm sondazhet, apo exitpolet, por edhe Basha.
Mjafton të shikosh Tiranën e Erion Velisë, ku në shumë zona, rezultatet për PS-në, shkojnë nga 55-65 për qind në favor të PS-së, për të kuptuar fshatin. Ky realitet i fshatit, tregon se, megjithëse dje kishte votim më të madh se në 2017-ën, çka në kuptimin klasik, do të ishte favor për opozitën, sepse rritet fryma kundër qeverisë, nuk u përkthye në favor të faktorit opozitë. Këtë të vërtetë të thjeshtë, nuk e kupton as Basha, as sondazhet, as exitpolet, po kam idenë edhe një pjesë e analistëve të studiove.
Në një analizë të një karakteri tjetër, mund të kuptosh thjesht, pse analizat e pafundme janë pa bukë. Që PD, të fitonte, duhet patjetër të përqëndrohesh në aksin Tiranë -Durrës-Elbasan, apo ndryshe, Shqipërinë e mesme. Kjo bëhet detyrim nëse mendon që Jugu, fitohet tradicionalisht, nga PS dhe Veriu, nga PD. Po nëse shumica janë në jug, si banorë dhe deputetë, e vetmja mënyrë është të kërkosh fitoren në Shqipërinë e mesme. Rezultatet e deritanishme në Durrës, Elbasan edhe nëse Tirana do të dilte brazim, tregojnë pse duket e pamundur fitorja e PD-së. Kjo edhe nëse vërtetohet teza e Bashës, se në 40 për qind të kutive, deri para pak, mund të jenë numëruar votat e qeverisë.
Për ta mbyllur. Moskthimi i plotë i dhuratave, dhënë dikur LSI-së, në shtëpinë e PD-së, ka krijuar idenë e rritjes së PD-së, çfarë është iluzion. Mosinteresimi i plotë në Shqipërinë e mesme, pra, zonat Tiranë-Durrës-Elbasan është faktori i dytë, i humbjes së PD-së. Mosvajtja në fshat, ka thelluar humbjen, në mënyrë përfundimtare.
