Videoja e një burri të moshuar të infektuar me coronavirus, që vdesë në tualetin e spitalit në Napoli, është bërë virale në Itali, kurse drejtori i përgjithshëm i spitalit Guiseppe Longo, ka thënë se ngjarje të tilla janë për të ardhur keq.
Burri po shërohej ngas coronavirusi në spitalin Karderel, ndërsa shkaqet e vdekjes së tij janë të panjohura – edhe pse dyshohet se ka pësuar sulm në zemër, transmeton Telegrafi.
Sipas burimeve brenda këtij spitali, dikush ishte futur në tualet për ta realizuar videon, derisa personeli nuk ishte aty pasi po kërkonin një mjet me të cilin do ta transportonin trupin e pajetë.
Drejtori i përgjithshëm i spitalit Guiseppe Longo, ka thënë se për fat të keq ngjarje të tilla janë për të ardhur keq, dhe nuk e di se çfarë qëllimi kanë ata që publikojnë pamje të tilla.
Ai ka shtuar se tashmë kanë filluar hetimet për t’u zbuluar se kush është autori i videos. Në anën tjetër gjykata sot ka urdhëruar izolimin e trupit të pajetë të burrit, për t’u konstatuar nëse ai vërtetë ka pësuar sulm në zemër.
Ministri i Punëve të Jashtme i Italisë, Luigi di Majo, ka thënë se kriza shëndetësore ka dalë nga kontrolli në qytetin e tretë për nga madhësia në Itali, duke theksuar se janë shokuese pamjet e pacientit që është gjetur i vdekur në spital.
Ai ka ripërsëritur se agjencitë lokale duhet të sigurojnë qytetarët e tyre.
“Situata në Napoli dhe rajone tjera ka dalë nga kontrolli. Qeveria duhet të ndërhyjë sepse nuk ka mbetur edhe shumë kohë”, ka shtuar Di Majo, shkruan Reuters.
Mjekët në Napoli kanë bërë të ditur se situata në spitalet e këtij qyteti janë buzë kolapsit, siç po ndodh edhe në qytetet tjera. Numri i të sëmurëve nga coronavirusi që nga fillimi i pandemisë në Itali, ka tejkaluar shifrën prej një milion.
Deri më tani si rezultat i COVID-19, në Itali kanë humbur jetën 42.953 persona.
