Me vendimin e ri të qeverisë, qytetarët e Kosovës obligohen t’i mbajnë maskat kundër koronavirusit pavarësisht se ku ndodhen.
Inspekcioni në Prishtinë qysh dje ka filluar t’i ndalojë të gjithë ata që nuk e respektojnë këtë masë.
Kështu ka bërë të ditur drejtori i Inspekcionit në Komunën e Prishtinës, Adonis Tahiri.
“Dje janë marrë shënimet për procedurë të mëtutjeshme për 115 qytetarë. Kurse sot janë ndaluar 60 qytetarë përgjatë inspektimeve në terren bashkë me Policinë e Kosovës”.
Numër i madh i inspektorëve dhe pjesëtarëve të Policisë së Kosovës janë parë dje dhe sot nëpër rrugët e kryeqytetit.
Megjithatë, ata që nuk i respektojnë masat kundër COVID-19 do të dënohen nga Policia e Kosovës.
Sipas Afrim Ahmetit, drejtori i Operacioneve në Policinë e Kosovës, dënimet shkojnë nga 2 deri në 12 vjet burg, ndërsa për kundërvajtje sipas Ligjit për parandalimin e sëmundjeve ngjitëse deri në 8 mijë euro gjobë.
Deri më sot në Kosovë janë konfirmuar 5 mijë e 118 raste me koronavirus.
