Pas deklaratës së presidentit amerikan Joseph Biden se Shtetet e Bashkuara janë të gatshme të mbrojnë Tajvanin ushtarakisht në rast të një pushtimi të Pekinit, autoritete kineze deklaruan sot se për çështjet që lidhen me interesat kineze “nuk ka vend për kompromis”.
“Kina nuk do të lërë asnjë hapësirë për kompromis për çështjet që lidhen me interesat e saj themelore, si sovraniteti dhe integriteti territorial”, u tha gazetarëve zëdhënësi i Ministrisë së Jashtme kineze Wang Wenbin.
Biden tha dje se Shtetet e Bashkuara do të mbrojnë Tajvanin dhe do të kenë detyrimin për të mbrojtur ishullin, të cilin Kina e konsideron territorin e saj.
Tensionet ushtarake midis Tajvanit dhe Kinës janë më të këqijat në më shumë se 40 vjet, vlerësuan zyrtarët tajvanezë në fillim të këtij muaji, shkruan danas.Tajvani thotë se është një shtet i pavarur dhe se do të mbrojë liritë dhe demokracinë e tij./sh.o.