Ish-shefat e grupeve parlamentare të Lëvizjes Vetëvendosje, përkatësisht PDK-së, Glauk Konjufca dhe Memli Krasniqi, janë përplasur me akuza e kundërakuza të rënda, transmeton Gazeta Mejdani
Siç shkruan Gazeta Express, Krasniqi mbrëmë në “Rubikon” e akuzoi Konjufcën dhe Vetëvendosjen se janë tabloid si i Aleksandër Vuçiqit.
“Ju Vetëvendosja jeni tabloid, e ti je kryeredaktori i tabloideve si të Aleksandër Vuçiqit. Ti e ke një mënyrë aq të poshtër me u shërby me llafe të shehrit e me i shitë si të vërteta, unë nuk të lo”, tha Krasniqi.
Teksa Konjufca i tha se skandalet e PDK-së dhe të Kadri Veselit janë më të mëdhatë, Krasniqi i tha që të mos e përmendë Kadri Veselin, por t’i thotë vetëm kryeministër.
“Kadri Veselin mos e përmend më, u kry puna e tij, prej sot thuaji Kryeministër ose më 6 tetor”, i tha Krasniqi.
Memli Krasniqi i tha Konjufcës që të flasë për Albin Kurtin, i cili e ka djegur Kuvendin.
“Fol për Albin Kurtin për piromanin e Kosovës, për njeriun që e ka kallë Qeverinë dhe Kuvendin”, tha ai.
Kurse Konjufca ia ktheu se Albin Kurtin e njeh populli i Kosovës.
“Albin Kurtin e njeh populli i Kosovës, kurse Kadri Veseli është njeri i nëntokës”, i ka thënë Konjufca. /Gazeta Mejdani/
