Kandidati për kryeministër nga koalicioni Nisma-AKR-PD, Fatmir Limaj ka deklaruar sot se befasia spektakolare e zgjedhjeve të 6 tetorit do të jetë Nisma në koalicion me dy partitë tjera, AKR dhe PD.
Gjatë takimit me strukturat e Nismës në Skenderaj, Limaj edhe një herë i ka bërë thirrje kandidatëve tjerë konkurrentë për kryeministër që të dalin para qytetarëve dhe t’i tregojnë ofetat e tyre.
Duke folur për kandidatët e tjerë për kryeministër, ai tha se nuk duhet të lejohen eksperimente me Kosovën.
“Mos të fshiheni pas partive të dalim në popull dhe të matemi, kush e meriton të qeverisë me Kosovën. Hajde dalim para qytetarëve tonë, të tregojmë çka ne bëjmë nëse e marrim qeverinë e vendit. Ejani t’i japim përgjigje qytetarit të vendit dhe pastaj ai të vendosë për votën. Le ta sheh njerëzit e Kosovës se çfarë përgjigje kemi për tema të ndryshme. Kush jemi ne që nesër do të qeverisim vendin”, tha ai./Gazeta Mejdani/
