Harxhimet për Vitin e Ri edhe sivjet do të arrijnë shifra enorme. E gjithë kjo tregon për sensin e shoqërisë kosovare sa i përket kursimeve dhe planifikimeve ekonomike, shkruan Gazeta Mejdani.
Në vijën e gjithë kësaj, shteti i Kosovës këtë vit ka importuar sasi të madhe të mjeteve piroteknike nga shteti i Kinës. Miliona euro janë shpenzuar për ta helmuar qiellin e Kosovës.
Hiç më pak se 6.3 milionë euro është vlera e 81 mijë kilogramëve mjete piroteknike, që janë importuar në Kosovë gjatë vitit 2019.
Për ndriçimin e qiejve, për zhurmimin në tokë e për kundërmimin e barutit në ajër Kosova edhe sivjet nuk ka kursyer aspak.
Të pamëshirshëm ndaj shëndetit dhe ndaj sigurisë së qytetarëve janë treguar edhe këtë fundvit bizneset, institucionet e qytetarët kosovarë, të cilët për dallim nga vitet e kaluara sivjet kanë rritur kërkesat për blerje të mjeteve piroteknike.
Institucionet relevante që do të duhej të merreshin me këtë anomali, edhe sivjet janë vënë në gjumë.
Zyrtarë nga Dogana e Kosovës kanë konfirmuar për “Zërin” se vetëm këtë vit janë importuar 81 mijë kilogramë mjete piroteknike, vlera e të cilave po del të jetë 6.3 milionë euro./Gazeta Mejdani/
Discussion about this post