Zgjedhjet e 6 tetorit në Kosovë, do të kenë në fokus dy përballje paralele shumë të rëndësishme për proceset në vend.
Në njërën anë, partitë shqiptare do të garojnë për udhëheqjen e Qeverisë dhe postin e kryeministrit, e në anën tjetër krahas me këtë partitë serbe do të luftojnë për marrjen e sa më shumë ulëseve në Parlament, nga 10 sa janë të rezervuara totalisht për këtë komunitet, shkruan lajmi.net.
Fuqia absolute e Listës Serbe gjatë këtyre viteve të fundit, mund të lëkundet goxha shumë këto zgjedhje.
Në garë kundër tyre aktualisht është krijuar një koalicion i quajtur “Slobodna”, me në krye ish-ministrin Nenad Rashiq, i cili është edhe kandidat për kryeministër. Paralelisht në garë është edhe Partia Liberale Serbe me kryetar Slobodan Petroviq.
Veç serbëve, partitë jo shqiptare do të kërkojnë edhe votën e shqiptarëve.
Nenad Rashiq nga koalicioni “Slobodna” për lajmi.net thotë se do të bëj dy spote elektorale, përmes të cilave do të kërkojë edhe votën e shqiptarëve.
Listën Serbe ai e quan “monstrum politik” që sipas tij duhet të hiqet sa më shpejtë nga skena politike.
“Unë mund të flas nga aspekti im profesional. Unë do të bëj dy sporte të shkurta që do t’u referohet edhe qytetarëve shqiptarë nga ku do të kërkoj mbështetje, sepse besoj se një prej sfidave kryesore tona është të heqim këtë influencë negative të këtij subjekti politik apo monstrumi politik që quhet Lista Serbe”, thotë Rashiq.
E kriter përcaktues për partitë serbe që të marrin sa më shumë ulëse në Kuvend do të jetë vetëm numri i votave.
Njohësi i Kushtetutës, Riza Smaka, për lajmi.net thotë se kjo çështje nuk është e rregulluar me aktin më të lartë juridik, por se me dispozita ligjore.
“Kjo çështje nuk është e rregulluar me Kushtetutë, por megjithatë me dispozita ligjore. Kriter përcaktues për numrin që partitë serbe fitojnë në zgjedhje është numri i votave që ato fitojnë në zgjedhje”, thotë Smaka.
Nga ana tjetër, Nenad Rashiq thotë se numri i votave që shqiptarët do ia japin koalicionit të tij, do të tregojë edhe nivelin e tolerancës dhe qytetarisë që ka arritur populli i Kosovës.
“Unë besoj që kam të drejtë t’u drejtohem edhe qytetarëve shqiptarë, dhe në atë formë të shohim se në çfarë niveli të qytetarisë kemi arritur dhe të tolerancës, sepse besoj që kam shërbyer mirë që 18 vjet në politikë. Nuk e di çka mund të pres, por pasi që jam rritur këtu, jetoj këtu me familjen dhe jam serb autentik, mendoj që mund t’u drejtohem edhe shqiptarëve”, përfundon Rashiq.
E njohësi i çështjeve politike, Blerim Burjani për lajmi.net thotë se për vendin do të ishte më e shëndetshme që në Kosovë të fitonin partitë serbe që nuk janë të dirigjuara nga Beogradi.
Sipas tij, një zë autokton i serbëve do ta ndihmonte shumë këtë pakicë.
“Do të ishte mirë për serbët kosovarë të fitonin partitë e koalicionit që nuk dirigjohen nga Beogradi, të jenë zëri autokton serb, të jenë aktive për të mirën e tyre në Kosovë dhe jo si deri tash që Serbia kontrollon jetën e serbëve të Kosovës dhe manipulon me ta”, thotë ai.
Madje siç thekson Burjani, serbët e Kosovës nuk duhet të merren më me Beogradin por veç me veten e tyre.
“Ata nuk duhet të mbesin peng i qëndrimeve që gjithmonë të dëgjojnë çfarë thotë Beogradi”, thekson ai.
Lista Serbe, sipas njohësve të çështjeve të sigurisë do të kërkojë influencimin indirekt të zgjedhjeve përmes strukturave të saja.
Gjithsej, në Kuvendin e Kosovës janë të rezervuara 20 ulëse për komunitetet pakicë./Gazeta Mejdani/
