Edi Rama e shfrytëzoi në mënyrë perfekte fabulën e një qeni që lehte rastësisht gjatë ekzekutimit të himneve të Shqipërisë dhe Kosovës, për të stigmatizuar ata që flasin për një marëdhënie gati armiqësore mes tij dhe Albin Kurtit.
Shkruan: Andi Bushati
“Qentë le të lehin, karvani shkon përpara”-tha ai, duke iu përgjigjur lajmit të përhapur në mediat e dy vendeve, sipas të cilit shefi i qeverisë së Tiranës, po komploton për të rrëzuar nga pushteti homologun e tij në Prishtinë.
Personalisht nuk e vë dot dorën në zjarr, se scoop-i i zbuluar nga portali Nacionale, e cila pretendon se ekzistojnë edhe përgjime, është i vërtetë. Madje më duket çudi që një shtetar të lërë gjurmë kaq të dukshme në një samit ndërkombëtar si ai i Ohrit, apo që një manipulator i sofistikuar, ti bëjë gjërat kaq trashë.
