Juristja nga Gjilani, Xhevahire Abazi, e njohur me shkrimet e thella të saj dhe me qasjet kritike ndaj gjendjes së përgjithsme të shoqërisë sonë, kësaj radhe ka shkruar për ikjen e shqiptarëve nëpër botë, shkruan Gazeta Mejdani.
Ajo ka përmendur data e vite të shpërnguljes së shqiptarëve nga trojet e tyre. Dikur nga dhuna serbe e sot nga atmosfera ngulfatëse që e ka kapluar gjeografinë shqiptare.
Në fund të shkrimit të saj ajo ka thënë: Shqiptareve këndej e andej Drinit kurr s’ju nda gazepi! Mos pyesni nga kush!
Më poshtë gjeni postimin e plotë në llogarinë e saj në Facebook:
Shqiptarë, kujt t’i ankohemi?!
Më 1912 – 1915 Shpërngulje masive e shqiptarëve për në Turqi.
Prap më 1920 – 1930 Shpërngulje e shqiptarëve
Prap me 1937 – 1941
Prap më 1955 – 1957
Prap më 1967 – 1970
Dhe më 1999 pa 1 milion shqiptarë mbetet Kosova
Të gjitha këto data paraqesin statistika që shqiptarët në mënyrë masovike janë shpërngulur nga trojet e tyre etnike.
Vetëm nga zullumi serb!
Dhe që nga “çlirimi” më 1999 e këndej, qindra e mijëra shqiptarë u shpërngulën nga Kosova. Tani, jo vetëm për Turqi. Më nuk zgjodhën ku, “Edhe ku brenë miza hekur” thoshte lokja ime. Gjithkund në botë, gjithkund!…
Por, tani jo nga serbet, jo nga lufta me armë, por nga lufta psikologjike dhe nga skamja e varfëria që ia bënë vet shqiptarët.
Shkuan dhe u asimiluan, fëmijët në perendim nuk flasin shqip, humbën përjetë.
E kush mbet këtu? Unë po. Por edhe si unë disa që nuk kanë ku shkojnë, tjerët po ikin e po i përzënë nga shtëpitë e tyre…
Shkuan doktoret, profesoret, shkuan burra dhe gra, fëmijë, shkuan ardhmëria jonë, shkuan të gjithë ata që ekzistenca e tyre këtu, ishte në rrezik!
Po shkojnë edhe vajzat e mija, nanën po e lënë si të gjitha nanat tjera që kanë mbetur këtu, zemrën e tharë, lotin në faqe, e me të vetmen lutje, Allahu iu pastë nën mbrojtje e kofshi shëndosh kudo qe jeni.
Por, kjo gjamë nuk është për të gjithë.
Në politikë sot me aderime, me krijimin e partive te reja, me prurje të reja e me luftë për pushtet mbi këtë vend, pa shtet.
Kend do ta udhëheqin as këta nuk e dijnë?!
Po ska rëndësi më se kend do udhëheqin, e as kush do udhëheqë!
Kushdo qoftë, me pleqtë leht do ta kenë, me familjarët e tyre po ashtu, edhe me ata që kanë disa fytyra, e edhe me viktimat e tyre.
Këtu mbeta edhe unë. Mbeta për të qenë dëshmitare në ditën e gjykimit para gjykatësit suprem, Allahut se, këta ishin tradhëtarë dhe ishin vjedhësit e kafshatës sime.
Shqiptareve këndej e andej Drinit kurr s’ju nda gazepi!
Mos pyesni nga kush!
/Gazeta Mejdani/
